حجةالاسلام عابدی مطرح
ائله‌دی
ایمام خمینی‌نین (ره) «قدر
سوره‌سی» واسیطه‌اینن عیرفان اوستادیله تانیش اولما ماجراسی
علمیه حوزه‌نین اوستادی: «إِنَّا
أَنْزَلْنَاهُ فِی لَیْلَةِ الْقَدْرِ» یعنی؛ بیز اونو قدر گئجه‌سینده نازیل
ائلهدیک. آما «او»دان منظور نه‌دیر؟ بو مسأله‌نی بیلمک بیر جریانا مونجر اولور کی
ایمام خمینی (ره) اؤز عیرفان اوستادی آیت‌الله شاه‌آبادی اینن تانیش
اولور.
فارسین خبرینه گؤره, کانال
اوچده نجفدن حضرت امیرالمؤمنین(ع) حرمیندن پخش اولان برنامه‌ده علمیه حوزه‌نین
خاریج درسی‌نین اوستادلاریندان حجت‌الاسلام و المسلمین احمد عابدی, حضرت امیرین(ع)
فضاییلی و قدر گئجه‌سی‌نین اهمیتیندن دانیشدی.
او بو برنامه‌نین بیر
بؤلومونده قدر سوره‌سینی تفسیر ائله‌دی و «إِنَّا أَنْزَلْنَاهُ فِی لَیْلَةِ
الْقَدْرِ؛ بیز اونو قدر گئجه‌سینده نازیل ائلهدیک» باره‌ده دئدی: معمولاً بو
آیه‌نی بئله ترجومه و معنا ائله‌روق: بیز «قورآنی» قدر گئجه‌سی نازیل ائلهدیک! حال
بوکی بو آیه دئییر بیز «او»نو قدر گئجه‌سی نازیل ائلهدیک.
فیقه و اصول خاریج درسی‌نین
اوستادی دئدی: «انزلناه» دا کی «ه» ضمیری واسیطه اولدو کی ایمام خمینی(ره) عیرفان
اوستادی آیت‌الله العظمی شاه آبادی(ره) اینن تانیش اولسون. ظاهیراً ایمام جوانلیقدا
قوم کوچه‌لرینده بیر قوجا روحانی‌یه راست گلیر کی بیر عیده اوندان سوآل سوروشوب
جواب آلیردیلار. ایمامدا فیکیرله‌شیر کی چوخدان ذهنینده اولان سوآلینی اوندان
سوروشسون. بونا گؤره «إِنَّا أَنْزَلْنَاهُ فِی لَیْلَةِ الْقَدْرِ»ده‌کی «هُ»
ضمیری‌نین مرجعنی سوروشور.
عابدی آرتیردی: آقای
شاه‌آبادی بئله بویورور کی بو «هُ» « غیبیه هویتینه » قاییدیر! ایمام اونلاردان
سوروشور غیبیه هویّتی نه‌دیر؟ آیت‌الله شاه‌آبادی جواب وئریر کی اونون معناسینی
بیلمک اوچون گرک 6 آی منیم کیلاسیما گله‌سن. بئله اولور کی مورید و مورادلیق
رابیطه‌سی ایمامینان اوستادی‌نین آراسیندا قورولور.