آمریکالی دانیشمندلر بیر یول تاپیبلار کی
اوکسیژن بیر باشا قانا تزریق اولور و اینسانی, بؤحرانلی واختلار و نفس چکه بیلمه‌ین
زمانلار دیری ساخلیر.
ساینس دیلی‌نین وئردیغی گوزاریشه گؤره,
بو یول ائلیه‌بیلر موتخصیصلره کؤمک ائله‌سین کی جراحلیق زمانی و یا آیری بؤحرانلی
واختلار تنفوس دستگاهی اولمادان, مصدومی 30 دقیقه بویوندا دیری
ساخلاسینلار.
دؤکتور جان خیر
(John Kheir) و همکارلاری, بوستون اوشاقلار مریض‌خاناسیندا,
بو ایشی گؤرمک اوچون, صوتی امواجدان ایستیفاده ائدیب اوکسیژنی چوخ نازیک یاغ
سلول‌لارین(پیتید) ایچینه قویورلار و بو ماده‌نی بیر باشا قانا تزریق ائلیرلر.
انگیزه‌یه تبدیل اولان
اؤلوم
دؤکتور خیر 2006-جی ایلده
شیدّتلی ذات‌الریه اثرینده آغ جیگرلری صدمه گؤرن بیر اوشاغا یئتیشیردی کی قانی‌نین
اوکسیژنی چوخ یئنمیشدی و دؤکتورلرین چالیشمالارینا رغماً, تنفّوس دستگاهینا
یئتیشینجن اؤلدو.
بو اوشاغین اؤلومو بیر
انگیزه اولدو کی دؤکتور خیر, قانا اوکسیژن یئتیرماق اوچون داها یئیین یول تاپسین.
البته 100 ایل قاباق بو ایش آزماییش اولموشدو آما خالیص اوکسیژنین قانا تزریق
اولماسی دامارلاردا خطرلی گازلار تولید ائله‌مه‌سینه گؤره بو تجروبه شیکست
یئمیشدی.
بونا گؤره دؤکتو خیر
چالیشدی کی بیر مادّه‌دن ایستیفاده ائلیه کی اوکسیژنی اؤزونده ذخیره ائلیه و سونرا
دامارلاردا آزاد ائله‌سین. بئله‌لیکله دؤکتو خیر و همکارلاری 2 ایلا
4 میکرومتر اندازه‌سینده اولان پیتیدلردن ایستیفاده ائدیب اوکسیژنی بو میکرو
مولکول‌لارین ایچینه یئرلشدیریب بیر محلول اله گتیردیلر.
دؤکتور خیر دئییر: بیز
بیر-بیرمیزین قانینی چکیب اوکسیژنین آلاندان سونرا آزماییش لوله‌سینه تؤکوردوق.
اوکسیژن ترکیبین قانا آرتیراندا, فورآ اوکسیژنسیز آبی قانین رنگی, قیرمیزیا دؤنوردو
و بو بیزیم ایشیمیزین موفق اولدوغونو گؤرسه‌دیردی.
سونراکی ایللرده, اونلار
موختلیف آزماییشلرینن بو نتیجه‌نی داها دا یاخجیلاشدیردیلار.
بو محلول حیوانلار اوستونده
موفّقیّت‌اینن آزماییش اولدو و تزریقدن سونرا حیوانلاری 15 دقیقه دیری ساخلایا
بیلدی. و نهایتده بو یول اینسان اوستونده‌ده آزماییش اولدو و اوکسیژنین اثری
تقریباً 30 دقیقه اینسانین قانیندا قالدی. گر چی اوندان آرتیق ایستیفاده اولاندا
قانا صدمه وورور.