بير مودت قاباغاجن ايرانلي‌لاري سوفره‌سيندن گؤي اسكيلمزدي.
سوفره آچيلاندا بيرنجي اؤزونو گؤرسه‌دن تازا گؤي، كاليش و قيرميزي تيرپينان دولا
اولان سوماقپالان اولاردي كي سوفره‌نين وسطينده آچيلميش گوله بنزردي. ايشتهاني
آچان گؤيلر كي يئماق هوسيني ايكي برابر ائلردي، آما ايندي بو سوفره طراوتي‌نين
سمبولي، داها آز گؤروشور.
جوربه‌جور آغ، قيرميزي سوْسلار، موختليف تورشولار و جوربه‌جور
چيپسلر بو طبيعي منظره‌نين يئرين توتوبلار.
ايندي ائله اولوب كي جوان خانيملارين بير عيدّه‌سي گؤيلرين
خاصيتلرين بيلميرلر و حتي اونلارين بعضي‌سين تانيميرلار. بونا خاطير پيس اولماز
گؤيلرين بعضي‌سي و اونلارين خاصيتلري‌اينن تانيش اولاق و بو ايطيلاعاتي اؤزوموزدن
سونراكي نسله اينتيقال وئرك.
سوزو؛ قانين كولسترول و فيشارين آزالدار
بو گؤيون ساقه‌سي يوخدور و غذايي جهتدن ساريمساق و سوغانا
بنزير، آما دادي و ايي داها مولاييم اولور. ايكي جور سوزو وار؛ بيري‌نين
يارپاقلاري قيسا و نازيك اولور و معمولاً يازدا و يايدا چيخار، بيري‌ده فيرنگي
سوزودور كي يارپاقلاري ائنلي، اوجا و قارت اولور و سوغاني‌دا بللي اولور.
سوزودا يوخاري ميقداردا پوتاسيوم اولدوغو اوچون ايدرار‌آور
دير و بدنين زهرلرين و قانين فيشارين و پيس كولسترولون آزالدار. اوندا اولان
منيَزيوم، پروستات و باغيرساق سرطانين قاباغين آلار و غذايلا بيرليكده يئييلسه
سوءهاضيمه‌ني درمان ائلر و معده‌نين آجيشماسين آزالديب خوشكيّت و بَواسيري
توختالدار.
هابئله دالاق ناخوشلوقلاريني آردان آپاريب مفصل آغريلارينا
فايداليدير. هابئله جينسي مئيلي چوخالدار. سوزو قارني يئللنديرر و بونا خاطير هر
نه قدر جوان و تازا اولسا داها راحات هضم اولار و اونون فايدالي مادّه‌لري بدنه
جذب اولار.
تيرپ سرطان سلّول‌لارينن ساواشار
تيرپين ائنلي و توكلو يارپاقلاري اولار. اوچ جوره قيرميزي،
قارا و آغ تيرپيميز وار. تيرپين خاصيتي ايستيدير و بير آز يئللندريجيدير. تيرپدا
گوگيرد وار كي اونا ضيد‌عوفني خاصيتي وئريب. هابئله تيرپ ياخجي ايشتها آچاندير.
اوندا اولان چوخلو ميقداردا C ويتاميني آغيز ناخوشلوقلارين درمان ائلر و ديشلرين چورومه‌سي‌نين
قاباغين آلار. بو ويتامين تيرپين يارپاغيندا داها چوخ اولار و غذا اينن بيرليقدا
يئييلسه، دميرين جذبينه كؤمك ائدر.
تحقيقلره گؤره تيرپ سرطانلي سلول‌لاري آرادان آپارير و شيمي
درماني‌نين عواريضين توخدالدير. هابئله اونداكي يود، گواترا موبتلا اولان
ناخوشلارا فايداليدير و بدنين مادّه موباديله‌سيني و قانين دولانماسين تنظيم ائلير
و صفرا كيسه‌سي و بؤيرك داشينا فايداليدير.
رئيحان؛ تسكين ائديجي و يوخو گتيرن
رئيحان چوخ عطيرليدير. خوشكيت و تشنوج ضيدي و عصبي باش
آغريسي و باش گيجللنمه‌نين درماني. تسكين ائديجي مادّه‌لرينه گؤره ايضطيرابدان
عمله گلن يوخوسوزلوقلاري درمان ائلر و ياخجي موسكّين ساييلير.
رئيحان آنالارين سودون چوخالدار و بؤيرك ايلتهابي
اوچون فايداليدير. بو گؤي قارني يئللنديرمز و معده‌نين ايسپاسملارين آرادان
آپارار.
شاهي، بؤيركلرين موحرّيكي
شاهي‌نين طبيعتي مؤعتديلدير. A و C ويتامينلر اونو قوي آنتي‌اوكسيدانا
تبديل ائله‌ييب و بدنين ضررلي راديكاللارين دفعينه كؤمك ائدر. هابئله قانين قندين
آزالدار و گوندن عمله گلن دري سپمه‌لريني آرادان آپارار.
شاهي قانين ياغ و پيس كولسترولون آزالدار و اونو بوخارلانان
ياغلاري آسم، بونشيت و موزمين اؤسكورماغا درماندير.
بو گؤيده كي مادّه‌لر بؤيرَكلرين فعاليّتين تحريك ائلر و
مثانه، بؤيرك و صفرا كيسه‌سي داشلاريني آرادان آپارار و مفصل آغريلاري و نقرسه چوخ
فايداليدير.
جعفري؛ قان دوزلدن و قايدايا سالان
جعفري دولودور ويتامين، معدني املاح، دمير، كلسيوم و
فوسفورونان. آيليق عادتي تنظيم ائله‌ييب قاني دورولدار و هابئله باغيرساقلاري ضيد
عفوني ائلر.
جعفري‌ده دميرين چوخلوغونا گؤره اونو گونده‌ليق يئماغي
قانسيزلارا و روشدلري ضعيف اولان اوشاقلارا توصيه اولور.
جعفري قارين يئلين آرادان آپارا و قارين آغريسين توختالدار.
بو گؤي قارا جيگر، تنگي نفس ناخوشلوقلاري و تئز يائسه اولماق علامتلرين آرادان
آپارار و اونو چئينه‌ماق آغيزين پيس ايين و معده‌نين قيجديرما گازلارين آرادان
آپارار.
ترخون، دوزون موناسيب جانيشيني
ترخونون توند و بير آز آجي عطري وار. يئمه‌لي گؤيون ايچينده
نئچه تئل ترخون ايشتهاني آچار و آغيزي عطيرلنديرر.
اونون توند اييي دري‌نين ميكروبلارين كونترول ائلر و بدنين
پيس ايين آزالدار. ترخونداكي توند ائسانس اونو دوز يئرينه ايشلنمه‌سينه ايمكان
وئرير و اونو غذا ايله بيرليقدا يئماق قلبي ناخوشلارا و قان فيشارلاري اولانلارا
يا دوزسوز غذايي رژيملري اولانلارا توصيه اولور.
ترخون اعصابي گوجلنديرر و ياغلي يئماقلارين هضمينه كؤمك
ائدر و بير مولاييم تسكين وئرندير. ترخون ياخجي زهر آلاندير و دردلري تسكين وئرر و
آيليق عادتي‌نين موشكوللرين دفع ائلر. بو گؤي بدنين ديفاع قودرتين چوخالدار و
ويروسي ناخوشلوقلارين شدّتين آزالدار.
گشنيش؛ قانين قندين آزالدار
گشنيشين طبيعتي سويوقدور و خوشا گليم ايي يوخدور. چينلي‌لر
بو گؤيه چينلي جعفري دئييرلر. گشنيش قانين فيشارين و قندين آزالدار، اورك بولانما
و سوسوزلوغا فايداليدير و ياخجي تسكين وئرندير. معده، بئيين و اورگي تقويت ائلر.
ضيدي ايسپاسم، ترله‌دن و ايشتها گتيرندير و قارا جيگر و دالاغين لاب ياخجي
درمانيدير.
بو گؤي، طبيعتي ايستي اولان يئماقلاردان عمله گلن جوشلاري
آرادان آپارار و جينسي مئيلي مولاييم ائلر. اونون چوخ يئييلمه‌سي يوخونو پريشان و
آيليق عادتين نامونظم ائلر. و اينساني گيجللنديريب درين يوخويا آپارار.