اوچا بيلن پلاستيكي صفحه‌نين دوزلمه‌سي
جام جم آنلاين: پرينستون دانيشگاهي‌نين
موحقيقلري، موفّق اولدولار اوچان خالچانين افسانه‌سيني واقعيّته تبديل ائله‌سينلر
و اوچماغا قادير اولان بير پلاستيكي خالچا دوزلتسينلر.
مهرين گوزاريشينه گؤره، بو شفاف و هوشلي
خالچا كي اندازه‌سي 10 سانتيمتردير «موج انرژيسي» گوجو اينن ترپشير. الكتريكي
انرژي موجلار خالچانين آلتيندا اولان هاوا بسته‌لريني دالي قاباق ائلير و خالچاني
اوچوردور.
بو ايبتيدايي نومونه‌نين سورعتي ثانيه‌ده
بير سانتيمتردير، البته دانيشمندلرين اومودو وار بو تكنولوژيني ياخجيلاديب
سورعتيني ثانيه‌ده بير متره چاتديرسينلار.
بو خالچانين يارالداني «نوا ژافریس» دئدي
كي بو خالچانين دوزلتمه‌سيني دوكتورا مقطعينده اوخودوغو رياضي مقاله‌سيندن ايلهام
آليب. او بو خالچاني دوزلتمك اوچون، الكترونيكي مدارلاريني، نانو جوهرينن پلاستيكي
صفحه‌نين اوستونه چاپ ائله‌ييب.
موحقيقلرين دئديگينه گؤره، يوخاري
الكترونيكي فركانسلاردا، شكلدن توشمگه دوچار اولان بو پلاستيك صفحه‌نين دقيق
كونترول ائله‌مه‌سي، بو تجروبه‌نين لاب چتين مرحله‌سي‌ايدي. چونكي خالچانين
بورولما مسيريني قاباقدان بيلمه‌ميش، الكترونيكي جرياني، دوز ميقداردا وئرمك
اولمازدي.
بو خالچانين اوچماق ايرتيفاعسي‌‌نين چوخ
اولماماسينا گؤره، موحقّيقلر اؤز مقاله‌لرينده اوچماق عيبارتيني احتياطينان ايشله‌ديرلر
چونكي اونلارين نظرينه بو ايبداع چوخراق «هاوركرافت»-ـا اوخشور تا بير اوچان زادا.
بو شئي گرك يئرين ياخينليغيندا اوچسون
چونكي هاوا، صفحه و يئرين آراسيندا تورا توشور، بئله‌ليگينن موجلار صفحه‌ده
ترپشنده هاوا دالي‌يا ايته‌لنير و خالچا حركت ائدير.
بو ايبداعين مزيّتلريندن بيري اوندا،
ترپشن قطعه‌لرين اولماماسيدير نئجه كي طيّاره‌ده وار، چونكي ترپشمك قطعه‌نين فرساييشينه
باعيث اولار.
موحقيقلر دئييرلر بير اينساني حمل ائله‌مگه
قادير اولماق اوچون، گرك بو خالچا 50 متر اولا.