فضادا اسگاردیا آدلی مستقل اؤلکه‌نین یارانماسی ناسا واسطه‌سی اینن گؤیه یوللانان تازا ماهواره اینن تحقق تاپماغا بیر آددیم یاخینلاشدی.
نیواطلسین وئردیغی خبره گؤره، بو ماهواره‌نین گؤیه آتیلما هدفی، میلیونلار انسانین یئردن فضایا کؤچمه‌سی و یئرین اطرافینا دولانان ماهواره‌لرده یاشاماغا زمینه فراهم ائله‌ماقدیر.
500 گیگابایت تصویر و متنی اولان 1Asgardia- ماهواره‌سی بونا گؤره فضایا آتیلیب. فضادا مستقل اؤلکه‌نین یارانما ایده‌سی، اطریشین وین شهرینده بین المللی فضا تحقیقات مرکزینی مدیریت ائله‌ین روس میلیاردری دکتر ایگور آشوربیلی طرفیندن مطرح اولوب.
او دئییر بو فضایی اؤلکه‌ده هامی برابر اولاجاق و فضایی علم اونلارین هامیسی‌نین اختیاریندا قویولاجاق و صلحون یارانماسی اولویت ساییلیر.
اسگاردیا آدلانان فضایی اؤلکه ماهواره مجموعه‌لریندن تشکیل تاپاجاق و بو ایده‌نین حمایتچیلری بو طریق اینن یئر اوزونده قان تؤکمه‌نین آزالماسینا اومید باغلاییبلار. دکتر ایگور آشوربیلی دئییر بو اؤلکه‌نین ساکنلری آینده‌ده قانون اساسی و ملی نمادلار باره‌سینده رأی وئره‌جاقلار. بو اؤلکه‌نین رسمی پولو سولار اولاجاق.
1Asgardia- ماهواره‌سی 10*10*20 سانتی متر اندازه‌سینده و 2.8 کیلوگرم آغیرلیغیندادیر. اونا اوخشار ماهواره‌لرین نه زمان گؤیه یوللانماسی هله بللی دئییل.