آمريكالي موحقيقلر اويناماق، اؤيرنمك و ايدزين درمانيندا
علمي تحقيقلره كؤمك ائتمك اوچون بير آنلاين اويون دوزلديبلر كي بو اويوندا
اوينويانلار اوچ بوعدلي پروتئين دوزلديرلر.
مهرين گوزاريشينه گؤره، «foldit» بير آنلاين
پروژه‌دير كي واشينگتون دانيشگاهي‌نين موحقيقلري يارالديبلار. بو اويون «پازئلي
علمه حل ائله» آدي‌اينن بير پروتئينين اوچ بودلي گيرافيكيني دوزلتمك اوچون عرضه
اولوب.
بو ترتيب‌اينن اويونچولار بو سايتا يولوخماغينان بير مخصوص
مولكولي ساختاري اوچ بوعدلي صورتده دوزلديرلر. بو اويون شبكه اويونچولاري‌نين
چوخونون ايستيقبالي‌اينن اوز به اوز اولوب.
اويونچولارين بو اوچ بوعدلي پازئلده دوزلتديقلاري پروتئين
بير آنزيمين مولكولي ساختاريدير كي ايدز ويروسونون چوخالماسي‌اينن موستقيم
ايرتيباطي وار. بو پازئل نتيجه‌لري ايدزين تحقيقاتيندا چوخ بؤيوك اهميتي وار، ائله
كي بو نتيجه‌لر نيچر بيولوژي مولكوليده‌ده ياييلير.
«foldit»-ين طريقي‌اينن
دانيشمندلرين اوچ اوّليّه هدفلرينه چاتماق اولار: اويناماق (3 بوعدلي پازئلين حلي‌اينن)،
اؤيرنمك (علم عرصه‌سينده تازا مسأله‌لر اؤيرنمك) و ايدز تحقيقاتينا كؤمك ائتمك (بو
آنزيم نه‌جور ساختاردان تشكيل تاپيب).
دونيانين باشا باشيندا اويونچولار 3 هفته عرضينده ائليه‌بيلرلر
بو مولكولي ساختاري بو سايتدا دوزلتسينلر.
واقعده بو اويون، اويونچولاري بالقوّه بير دانيشمنده تبديل
ائلير. اويونچولارين پيشنهاد وئرديكلري ساختارلار شيمي زيست‌شيناسلارا يوللانير و
بو دانيشمندلر اؤز تئوريك مودئل‌لري‌نين شرحي اوچون بو پازئل‌لردن كؤمك آليرلار.
«M_PMV» آدلانان بو
آنزيم «ترو ويروسي پروتئازلار» گوروهوندا يئر آلير و «HIV» كيمي
ويروسلارين روشدو و چوخالماسيندا موهوم نقشي وار.