معمولاً اوشاقلارین اسپناه، یئرکؤکو، چوغوندور و اوخشار گؤیلری یئماغی سئومزلر. آما بو گؤیلر اونلارن بؤیومه‌سینه لازم اولان مادّه‌لردیلر. گؤیلر، خاصیتلی اولدوقلاریندان علاوه سویوق دَیمه و سایر ناخوشلوقلارین قاباغینی آلارلار.

اوشاقلاری زورونان بیر شئیی یئماغا و یا بیر ایشی گؤرماغا مجبور ائله‌ماق دوز ایش دئییل. یا اصلاً ممکن ایش دئییل. بونا گؤره اونلارا گؤی یئدیرتماق اوچون تشویقلردن و اویونلاردان کؤمک آلماق لازمدیر.

اوشاقلار خورک یئماغا باشلایاندان گؤی یئماغا عادت ائله‌مه‌لیدیلر. بوگونه قدر بو ایشی گؤرمه‌سز بو گوندن اونلارین غذالارینا گؤی قاتین. گؤیون دادی اوّلده اونلارا عجیب گلسه ده تدریجله انا عادت ائلیه‌جاقلار.

اوشاقلار بؤیوکلردن تقلید ائله‌ماغی سئورلر. بونا گؤره اونلارین گؤی یئماغی اوچون بؤیوکلر ده گؤی یئمه‌لیدیلر. اوشاقلارین ذائقه‌سی سیزین الیزده‌دیر اونلاری دَییشه بیلرسیز. مثلاً سالادین ایچینه کاهی، بامادور و خیاردان علاوه پیشمیش یاشیل نوخود دا آرتیرین. یاشیل نوخودون اندازه‌سی اونلاری یئماغا هوسلندیره‌جاق.

یئمه‌لی آشدا جور به جور معدنی مادّه‌لر و ویتامینلر وار. گونده‌لیق جور به جور آشلارینان اوشاغی مختلف دادلارینان تانیش ائله‌یین.

اوشاقلاری گؤی یئماغا تشویق ائله‌یین. حتی اونلارا گؤی یئماق اوچون جایزه وئرین. بو مسأله ایشین باشلانیشیندا داها چوخ اهمیتلیدیر.

بروکلی کلمی کیمی یاشیل رنگلی گؤیلری نارین دوغرایین کی او بیریلرین ایچینده گیزلنسین. اوشاقلارین یاشیل گؤیلره بازلیقلاری اولماز.

گؤیلری اونلارین سئودیقلاری غذالارینان مخلوط ائله‌یین و اونلارا غذا وئرنده غذانین بوشقابداکی دوزولوشو خوشا گلیم و تفریحلی اولسون. مثلاً سالادین ملزلمه‌لری اینن بوشقابدا دووشان شکلی یارادین.

گؤی آلماغا اوشاقلاری‌دا آپارین و آلاندا اونو گؤیلرین آدلاری اینن تانیش ائله‌یین و هر بیرینی بیر ناغیل و خوشا گلیم شکلده اوشاغا تانیتدیرین.

اؤز حیاطیز اولسا اوردا جور به جور گؤیلر اکین و بو ایشی اوشاغینان بیرلیکده گؤرون.

اوشاق گؤیلرین بیرینی سئومه‌سه اونون شکلینی دَییشین مثلاً بامادورو مزه‌لی شکلده دوغرایین و یا لاپ بالاجا بامادور اوشاغا وئرین.

اوشاق بوشقابینداکی گؤیون سئومه‌دیگینی دئسه گولر اوزونن اونو بوشقابیندان گؤتورون آما گلن سئری همان گؤیو آیری شکلده اونون بوشقابینا قویون. اوشاق او گؤیو سئونه قدر بو ایشی ادامه وئرین. اوشاغا گؤیلرین دوغراماسینی اؤیردین بو ایشله او اؤزونو غذانین حاضرلاماسیندا شریک بیلر و اونو دئماغا هوسلنر.