تزه‏لیکده، محققلر، آزماییش نتیجه‏لرینی تفسیر ائده بیلن و علمی تحقیقلرده شیرکت ائده بیلن روبوتلاردان پرده‎ گؤتوروبدورلر.

دونیانین تحقیق مرکزلریندن ایکی تیم، گئچن سه‏شنبه گونو، داده‏لردن نتیجه چیخارابیلن و اونلاری فورمول و قضیه‏لره چئویره‏بیلن هوشلو ماشینلاری تانیتدیلار.

بئله‏لیکله، یاخین گلجکده، روبوتلار، بیولوژیک سیستئملرین طرّاحیسی، داوا-دوزلتمه و هاوا پیشبینیسی مودئللرینی دوزلتمه کیمی پروژه‏لرده عالیملره کؤمک ائده‌بیلرلر.

رویتئرزین گزارشینه گؤره، آبریستویت وئلز دانیشگاهینین محققلری آدام آدلی بیر روبوت دوزلدیبلر کی ایشینین ایک مرحله‏لرینده، مخمّرلرین مئتابولیسمی اوزرینده بیر آزماییش ائله‎دی.

آدام‎ین بو آزماییشده‎کی نقشی، گؤزلم (مشاهده)، اطلاعات ییغماق، نتیجه‏نین اعلامی و داها مترقّی بیر آزماییشین طرّاحیسییدی.

آدامی دوزلدن تیمین باشچیسی اولان راس کینگ، بیر مصاحبه‎ده دئییر: " آدام، تک باشینا، فرضیه‏لر دوزلدیب اونلارا گؤره آزماییشلر ائده‏بیلر. بیز آدامین فرضیه‏لرینین دۆزلویونو تئست ائتمیشیک... میلادین 1960-لی ایللریندن بری، بیر چوخ اینسان بو جۆر پروژه‎لرده چالیشیب؛ ایلک روبوتون مئرّیخه گؤندریلدیییندن بویانا هامی اومیدواردیلار کی بیر گون ائله بیر روبوت مئرّیخه گئتسین کی ایسته‎نیلن آزماییشلری و دنمه‏لری(دنمه: آزمایش تجربی) بو سیاره‎ده آزماییش ائده بیلسین.

بو تیم، آیری بیر روبوت اوزرینده ده چالیشیر کی داها آرتیق قابیلیتــلری وار و داوا ترکیبلرینی دوزلتمکده ایشله‎نه‎بیلر.

سایینس (Science) درگی(ژورنال)سی، دوکتور کینگ و تیمینین چالیشمالارینین نتیجه‏لرینین چاپیندان علاوه، نیویورکون کورنئل دانیشگاهیندا، آیری بیر تیمین ده تحقیقلرینین نتیجه‎لرینه نظر سالیبدیر.

باشچیسی هاد لیپسون اولان بو گروه، پاندول حرکتینده فیزیکین پایه قانونلارینی آنلایابیلن بیر کامپیوتئر برنامه‎سی دوزلتمک اوچون تحقیق ائدیر.

بو برنامه، آنجاق معروف آونگ آزماییشینین عددلری و آزماییش نتیجه‏لری ایله بو آزماییشین حرکت قانونلارینی و مئکانیکینی آنلاماغی باشاریبدیر.

اونلاین (Online)  همشهری.