محققلر، پانکراس سلول‌لاری‌نین ژنتیک انتقالی اینن سیچانلارین دیابتینی درمان ائله‌دیلر.
نیو اطلسین وئردیغی خبره گؤره، ایندی‌یه قدر محققلر دیابت ناخوشلوغونو غذا رژیمی و مشخص مقداردا انسولین اینن کنترل ائله‌ییبلر. آما سان آنتونیو تگزاس دانشگاهیندا (UT Health San Antonio) بو ناخوشلوغون سیچانلار اوستونده درمانی اوچون بیر یول تاپیبلار. اولا بیلر بو یول انسانلاردا دا ایکینجی نوع دیابت ناخوشلوغو درمانیندا ایشه یاراسین.
بیرینجی نوع دیابتده پانکراس، بدنه لازم اولان انسولینی تولید ائله‌میر. آما ایکینجی نوعدا بدن لازم اولان مقداردا انسولین تولید ائله‌یه بیلمیر. بونا گؤره غذا رژیمی اینن بو گئدیشی کنترل ائله‌ماق اولار. آیری طرفدن بدنین انسولینی پانکراسدا یئر آلان «بتا سلول»و آدلی مخصوص سلول‌لاردا تولید اولور. بعضاً ده بدنین امنیت سیستمی اؤز علیهینه عمل ائلیر. یعنی بتا سلول‌لارینا حمله ائدیب اونلاری آرادان آپاریر.
ائله بو اساسدا UT Health مؤسسه‌سی‌نین محقق‌لری برونو دویرون و رالف دی فرونزو، ژن انتقالی یولوندان استفاده ائله‌ییبلر کی سیچانلارین پانکراس سلول‌لارینی دَییشسینلر. بئله کی حیوانین بدنی بو سلول‌لارین بتا نوعوندان اولدوغونو دوشونسون و انسولین دوزلتماغا باشلاسین.
محقق‌لرین دئدیغینا گؤره دَییشمیش سلول‌لار انسولینی فقط شکرینن دوزلدیرلر.
بو حالدا الدن گئتمیش سلول‌لارین یوزده ایگیرمیسی‌نین جایگزین اولماسی لازمدیر. آما تازا بتا سلول‌لاری معرفلیق اولونسا، اولا بیلر بدن اونلارا حمله ائدیب آرادان آپارسین.