ايطمينانينان دئمك اولار كي اينسانين حئيرتلي ترقي‌سي‌نين موهوم عاميل‌لريندن كاغاذين ايختيراعسيدي. كاغاذ بير نسلين تجروبه و علمي‌نين سونراكي نسله قالماسي معناسيندادي. كاغاذ باعيث اولوب تا اينسانلار بوتون علمي زمينه‌لرده اؤز گوجلريني آرتيريب و نهايتده ريفاهين او مرحله‌سينه قدم قويا كي جمعيّتي اينفيجاري صورتده چوخالماغا باشلايا. جمعيتين دواملي چوخالماسي و مصرفگراي‌ليغين ايشتيباه فرهنگي باعيث اولوب يئر سياره‌سي داها اينسانا لازيم اولان يوخاري حجمده سو و غذا و آيري ملزمه‌لري توليد ائليه بيلمه‌سين. كاغاذ دا اينسانين ايشلتديگي زادلارداندير كي ايتّيفاقاً لاب هزينه‌لي يولدان يعني اوكسيژن كرخاناسي اولان آغاجلارين كسيلمه‌سيندن اله گلير. آما دئيه‌سن اينسان هميشه موشكول‌لرينه بير چاره تاپير. تازاليقدا تايوانلي دانيشمندلر ديجيتال كاغاذ دوزلديبلر كي هم اونو تازادان يازماق اولور و هم موحيط زيست‌اينن سازگارليغي وار و برقسيز ايشلير. بازاردا اولان الكترونيكي كيتابلارين خيلافينا بو ديجيتال كاغاذ تازادان يازيلما ايمكاني اولماقلا بك‌گراندين ايشيقلي اولماسينا احتياجي يوخدور، اونا گؤره ده برق ايشلتمير.

بو كاغاذلارين اينعيطافلي صفحه‌لرينده يازماغا تكجه ايستي‌يه احتياج وار. بير دفعه قيزيشديرماغينان يازي يا تصوير كاغاذين اوستونده حك اولوب قالير. ديجيتال كاغاذين يازيسيني سيلمك اوچون اونو فاكسا بنزر بير ايستي تحرير ماشينينا قويماق اولار.

بو تكنولوژيدن ديجيتال كيتابلار، الكترونيكي اعلان تابلولاري و بؤيوك ديجيتالي اعلان تابلولاريندا ايستيفاده ائله‌مك اولار.

آزماييشلرين نتيجه‌سينده بيلينيب كي بو كاغاذلاري 260 دفعه‌يه‌جن يازيب پوزماق اولار. بونو بيلمك چتين دئييل كي بو كاغاذدان گئنيش صورتده ايستيفاده اولسا نه‌قدر سونّتي كاغاذين مصرفينده صرفه‌جويلوق اولوب نه‌قدر آغاج، كسيلمكدن نجات تاپار. صنعتي تكنولوژيلار تحقيقات موسّيسه‌سي بو تكنولوژيني تايوانلي كومپاني‌يه بوراخيب و اينتيظاري وار بو محصول بير ايكي ايلين عرضينده بازارا وئريله و گؤزه گليم موفّقيّته ال تاپا.