طبی علملر دانشگاهی محققلری‌نین تحقیقلری پخله‌نین پارکینسون ناخوشلوغونون
درمانیندا تأثیرلی اولدوغونو گؤرسدیر.
مشهدین طبی علملر دانشگاهی‌نین محققلریندن اولان دکتر نیکخواه دئییر: مشهدین طبی علملر
دانشگاهیندا 30 ناخوش اوستونده پخله‌نین پارکینسون درمانینداکی تأثیری بیلیندی.
بو مغز و اعصاب متخصصی آرتیردی: پارکینسون ناخوشلوغو، 50 یاشدان سونرا گؤرونن
مغز و اعصاب ناخوشلوغودور.
دکتر نیکخواه، پخله‌ده مخصوصاً جوجرمیش پخله‌ده چوخلو
دوپامینین اولماسینا اشاره ائله‌ماغینان آرتیردی: پارکینسون ناخوشلوغو توتانلارین بئینینده
دوپامین میزانی آزالار و لازم اولان دوپاینی ائشیدن آلمالیدیر.
او آرتیردی: ایندیلیقدا دوپامین، یئمه‌لی داوا کیمی خارجی اؤلکه‌لردن گتیریلر.
آما پخله عصاره‌سینی داوا صورتینده دوزلتماغینان، دوپامین داواسینی اله
گتیرماق اولار.
پارکینسون ناخوشلوغو، 1817-جی ایلینده بیریتانیالی جیمز پارکینسون طرفیندن کشف
اولان، آرتان عصبی بیر ناخوشلوقدور.
پارکینسونون دؤرد علامتی وار:
استراحت حالیندا ال – آیاغین تیتره‌مه‌سی، حرکتلرین
یاواشلیغی، عضله‌لرین قورویوب برکیمه‌سی و تعادلون یوخلوغو.
ناخوشلوغون اولیه مرحله‌سینده بدنین فقط بیر طرفینده اولان ملایم تیتره‌مه‌لر یارانیر و
درمانا احتیاجی اولماز. آما گئتدیقجان شخص تیتره‌ین الینی داها
جیبینده و یا دالیسیندا گیزله‌ده بیلمز.