سلامت، درمان و آموزش وزیری‌نین معاونی  قان فشاری‌نین چوخلوغونو اؤلکه‌میزده ایلده 83 مین نفرین جانین آلدیغیندان خبر وئردی. ایرنانین وئردیغی خبره گؤره، وزیر معاونی کانادالیلارین گونده‌لیق دوز مصرفینی 8 / 1 الی 5 / 2 گرم و بیزیم اؤلکه‌میزده بو رقمین 10 گرم اولدوغوندان خبر وئردی. هابئله بیزیم جماعتیمیزین آز تحرّکلی اولماسی قان فشاری‌نین چوخلوغونا گتیریب چیخاریر.

انسانلارین 85 ایل معلولیتسیز و ناخوش اولمادان یاشییا بیلدیقلاری بیر حالدا بیزیم جماعتیمیز اکثراً 40 ـ 50 یاشلاریندا مختلف ناخوشلوقلارا مبتلا اولورلار.

قان فشاری‌نین چوخلوغو، دیابت، حددن آرتیق کؤک اولماق، تحرّکون آزلیغی، قانداکی یاغین چوخلوغو و سیگار اؤلکه‌میزده‌کی اؤلوم سببلرین یاریسینی تشکیل وئریر. یعنی بیر آز دقّتلی باخساق اؤلنلریمیزین یاریسی اؤزلرینی ناخوشلوغونان اؤلدورورلر !

بو عامل‌لر سرایت ائله‌مه‌ین ناخوشلوقلارا سبب اولور. و متأسفانه بیزیم اؤلکه‌میزده بو ناخوشلوقلارین قاباغینی آلماغا دوزگون برنامه یوخدور.

انسانلاریمیزین تعلیمی و اونلارا تازا تحرّکسوز یاشاییش سبکینده، اؤزلرینی ناخوشلوقلاردان نئجه قوروماقلارینی اؤیرتمه‌لی‌یوق کی متأسفانه ایندیلیقدا بونون اوچون جامع برنامه‌میز یوخدور.