مختلف سمّ‌لر و هوا چیرکندیریجی مادّه‌لرین تولیدی بو گونکی صنعتی دنیاسی‌نین دغدغه‌لریندندیر. انسان و سایر موجوداتین زندگانلیغینی خطره سالان زهرلی مادّه‌لر. صنعتی چیرکندیرنلری تصفیه ائله‌ماق، قورقوشوم، جیوه، مادیوم و آرسنیک کیمی مادّه‌لرین زهری‌نین تمیزلنمه‌سی اوچون لاپ مناسب یولدور.
بو سمّ‌لر نئجه انسانین بدنینه داخل اولور؟ و اونلاری نئجه بدندن چیخارتماق اولار؟
اوست-اوسته بدنده اولان زهلری ایکی دسته‌یه بؤلماق اولار: بیتکی سمّ‌لری، حشره داوالاری، هوا چیرکلیغیندان عمله گلن آغیر فلزّلر و مختلف دخانیات کیمی بو زهرلرین بؤیوک قسمی، ائشیکدن بدنه داخل اولورلار.
زهرلرین آیری قسمی‌ده، غذا و داوالارین بدنده تجزیه اولماسیندان تولید اولورلار.
سیگار چکماق بدنه زهر داخل ائله‌ماغین مسلم یوللاریندان بیریدیر آما آیری یوللار دا واردیلار کی مختلف زهلری انسانین بدنینه داخل ائلیرلر. تنفّس ائله‌دیغیمیز هوا، یئدیغیمیز غذا، ایچدیکلریمیز و آتدیغیمیز داوالار بدنیمیزه زهر داخل اولماغین آیری یوللاریدیر.
هابئله جسمی و روحی فشارلار بدنده بیر سئری زهرلرین تولیدینه سبب اولور.
ترله‌مه قاباغینی آلان اسپری‌لر، فلورسنت لامپلار، تصفیه اولموش قند و بزک و بهداشت لوازماتی بو زهلرین منبعی ساییلیرلار. بعضی ایچمه‌لیلرده‌کی یوخاری قندین اولماسی دیشلری آرادان آپارماقدان علاوه بدنه چوخلو مقداردا سدیم کربنات داخل ائلیرلر.
کنسور اولموش غذالاردا اولان آرتیریلمیش مادّه‌لر گونده‌لیق بدنه داخل اولان زهرلردن ساییلیرلار. آیری طرفدن، حشره داوالارینداکی فلوراید و کلر چوخ راحت شکلده سودا حل اولوب انسانین بدنینه جذب اولور.
هابئله موبایل کیمی وسیله‌لردن عمله گلن مغناطیس دالغالاری‌نین معرضینده اولماق، بدنه ضرر وورا بیلن بیر سئری زهلرین تولیدینه سبب اولور.
زهرلر بدنده داخل اولان زمان، بیرینجی اولاراق قره جیگر و سونرا بؤیرکلر اونو جذب ائدیب دفع ائله‌ماغا چالیشیرلار. بو عمل غذانین داها یاخجی هضمی و بدنه لازم اولان انرژینی‌نین تأمینی اوچون فایدالی اولور.
تازا میوه و تره‌وزلرین گونده‌لیق مصرفی بدنین زهرینی آلماقدا یوخاری مقشی اولا بیلر. مثلاً فیبر، کربوهیدرات و آنتی اکسیدنینان دولو اولان مادّه‌لرین مصرفی بدنه، سمّلرین دفیعینده کؤمک ائلر.
فیبرلر باغیرساقلارین حرکتینی آرتیرماغینان و آیری طرفدن باغیرساقلاردا اولان سمّ‌لره یاپیشماغینان بدنده‌کی سمّلرین دفع سرعتینی آرتیریرلار.
بدنین زهرینی آلماقدا تأثیرلی اولان مادّه‌لردن، بیتکیلرده اولان کلروفیلدیر کی بیتکیلرین فتوسنتز پروسه‌سینه کؤمک ائلر. بئله اینانیلیر کی بو مادّه‌نین ملکول قورولوشونون هموگلوبینه اوخشاماسینا گؤره او، انسان ساغلاملیغینا فایدالیدیر. کلروفیل قان آخیمی‌نین تمیزلنمه‌سینه، آغیز ایی‌نین محو اولماسینا، سرطانلی مادّه‌لرین تأثیرسیز اولماسینا و دیشلرین چورومه‌سی‌نین قاباغینی آلماغا سبب اولا بیلر.
کلروفیل، استالید زهرلرینی (یورقونلوق عاملی) و هیستامینلری (آلرژی عاملی) دفع ائله‌ماغینان انسانین یاشاییشیندا مثبت تأثیری اولار.
دنیانین کلروفیلدن لاپ غنی مادّه‌سی یاشیل یوسوندو، ائله بونا گؤره ژاپنلی‌لار بو مادّه‌نی چوخ مصرف ائلرلر. بو یوسونلاردا اولان کلروفیل، فیبر و پلی ساکاریدلی ترکیبات، بدنده اولان آغیر فلزّلر و حشره سمّلریندن قالان زهرلر و سایر چیرکلندیرنلرینن قاریشیب اونلار مدفوع یولو اینن بدندن دفع ائلر.
تحقیقلرین نتیجه‌سینه اساساً بیر آی بویوندا گونده‌لیق 3-2 گرم یوسون مصرفی، انسان بدنینی زهرلردن تمیزلیر.
آیری طرفدن گیاهی فیبرلر غذانین داها یاخجی هضمینه فایدالی اولورلار و باغیرساقلارین طبیعی حرکتینی آرتیرماغینان یبوست کیمی مشکل‌لری آرادان آپاریب هضم سیستمی‌نین داها ساغلام اولماسینا کؤمک اولورلار.
مناسب غذا رژیمی اینن هضم سیستمینی ساغلام ساخلاماق و اونا زهرلرین دفعینده کؤمک ائله‌ماق اولار:
1. فیبرلی غذالارین یئمه‌سی.
2. گونده‌لیق یاشیل چای و تازا لومو سویو ایچمک.
3. C ویتامینی اولان مادّه‌لرین یئمه‌سی. بو ویتامین گلوتاتیون تولید ائله‌ماغینان بدن زهرلرینی دفع ائله‌ماغا کؤمک ائلر.
4. گونده‌لیق 8 لیوان سوی ایچماق. چونکی سوی طبیعی اولاراق بدنین زهلرین و لازم اولمایان مادّه‌لرینی سودوک و تر یولو اینن دفع ائلر.
5. اضطرابسیز و مثبت انرژی اینن دولو یاشاییش.
6. درین نفس آلماق و اکسیژنین بدنه داخل اولماسی.
7. ترله‌ماغی آرتیرماق اوچون سونا لاپ گؤزل یولدور.
8. ورزش و فیزیکی فعالیت. گونده‌لیق بیر ساعت ورزش بدن زهرلری‌نین دفعینه لاپ گؤزل یولدور. ورزش زمانی نفس آلماق یئیینلشیر و قان آخینی آرتیر. نتیجه‌ده ترله‌ماق و سودوک مقداری چوخالیر.
9. ساریمساق، کلم، جعفری، کنگر، قند چوغوندورو و ساری کؤکون مصرفی بدنه زهرلری مخصوصاً قورقوشوم و جیوه‌نی دفع ائله‌ماقدا کؤمک اولار.
10. قیرمیزی رنگده اولان میوه‌لر بدن زهرینی آلماق اوچون لاپ تأثیر مادّه ساییلیرلار. بو میوه‌لر پتاسیم‌دان دولو اولور و قارا جیگرین تمیزلنمه‌سینده تأثیرلیدیلر.