والدین‌لر معمولاً اوشاقلارین دیشلرینده سانجی و رنگ دَییشمه کیمی آشکار نشانه گؤرمه‌یینجه اونلاری دؤکتوره آپارمازلار. بو اولا بیلر بونا گؤره اولسون کی بوندان قورخورلار دؤکتورلر اؤزلرینه ایش چیخارتماق اوچون سالم دیشلره خراب آدی قویسونلار.

بیر حالداکی اوشاقلارین دیشلرینی هر آلتی آیدان بیر معاینه ائله‌ماق لازمدیر. چونکی اولا بیلر سانجی و یا آیری علامت اولمادان دیش چؤرومگه باشلاسین و وقتینده تشخیص وئریلمه‌سه دیشین آرادان گئتمه‌سینه سبب اولسون.

اوشاقلارین دیشلری، اوّل بیر گوندن باخیما احتیاجی وار. والدین اوشاغین دیشلرینی هر سوت یئماقدان سونرا مخصوصاً گئجه یاتاندا تمیز و یوموشاق پارچا اینن تمیزله‌مه‌لیدیلر.

اوشاقلارین دیشلرینده یارانان آغ لکه‌لر اولا بیلر دیش میناسی‌نین اوستونده یارانان شیارلاردان اولسون و آیری سؤزونن دیشین چورومه‌سی علامتی اولا بیلر.

دیشلری تمیز ساخلاییب مسواکلاماقدان علاوه، تغذیه‌نین‌ده اونلارین سالم قالماسیندا مهم نقشی وار.

کیک و کلوچه کیمی شیرین و یاپیشان یئمه‌لیلرین یئرینه، پنیر-چؤرک کیمی طبیعی یئمه‌لیلر مصرف اولونسا دیشلرین سالملیغی اوچون چوخ اهمیّتلی اولار. وعده‌لر آراسیندا صنعتی یئمه‌لیلر یئرینه‌ده میوه و آجیلدن استفاده اولونسا دیشلرین داها ساغلام قالماسی‌نین احتمالی چوخالار.