بیزیم اؤلکه‌ده سوت مصرفی چوخ آشاغیدیر. یعنی آلمان، فرانسه و هلند کیمی مترقّی اؤلکه‌لرین تقریباً دؤرده بیری. بیزلر لاپ یاخشی فرضده ایلده نهایتده 80 لیتر سوت ایچیروق و هر هلندلی ایلده 480 لیتر سوت و لبنیات مصرف ائلیر. ائله بونا گؤره سوموک ناخوشلوقلاری، دیش و آغیز ناخوشلوقلاری و بؤیومه اختلال‌لاری بیزیم مملکتده اروپا اؤلکه‌لریندن چوخ چوخدور.

چوخلاری بئله دوشونور کی سوت و لبنیّات مصرفی هامی‌یا بیر حدّده لازمدیر بیر حالداکی بئله دئییل. یاخجی اولار بیله‌سیز کی 5 یاشدان آز اوشاقلارین لبنیّاتا احتیاجی گونده‌لیق 1.5 واحددیر، نوجوان اوغلانلارین گونده‌لیق 3 واحد، نوجوان قیزلارین گونده‌لیق 2.5 واحد، سوت وئرن خانملارین گونده‌لیق 3.5 الی 4 واحد، حامله خانملار گنده‌لیق 2.5 واحد و کیشیلرین و خانیملارین گونده‌لیق احتیاجی گونده‌لیق 2 واحددیر. البته یاخجی اولار اضافه کالری‌دن قاچماق اوچون آز یاغلی سوتدن استفاده اولونسون.

بیر واحد لبنیّات یعنی نه قدر لبنیّات؟

هر واحد لبنیّات بیر لیوان سوت و یا یوغورت و یا 30 گرم پنیر و یا تقریباً ایکی لیوان آیران ائلیر. بستنی آرتیق یاغلی اولدوغو اوچون لبنیّات ساییلا بیلمز. یاریم لیوان غلیظ قوروت و بیر لیوان دورو قوروت بیر واحد لبنیّات حسابلانا بیلر. البته دقّتیز اولسون کی قوروت، کلسیم و پروتئین کیمی املاحین اولدوغو اوچون لبنیّات سیراسیندا یئرلشیر یوخسا قوروتدا سوت، گنیر و یوغورتدا اولان ویتامینلر و ریبوفلاوین یوخدور.