انسان گؤزونو یومدوقدا ذهنی آییقلیقدا گؤره بیلمه‌دیغی عجیب - غریب افسانه‌لر دنیاسینا آددیم قویور. اورداکی حادثه‌لر ایندیه قدر هئچ قطعی علمی متودونان توضیح وئریلمه‌ییب.
«پاپ ساینس»ین وئردیغی خبره گؤره، بیر دسته فرانسه‌لی عالم یوخولارین انسان تخیّلی نتیجه‌سی اولدوغونو و یا بئیین عکس العملی اولدوغو باره‌ده بیر سئری تحقیقلر ائدیبلر و یوخولارین «بئیین سغه«- سی آدلانان بئینین بیر بؤلومو واسطه‌سی اینن یارانماسینی بیلیبلر. اونورغایا وصل اولان بئینین بیر بؤلومو کی انسان یوخوسونون تنظیمینده نقشی وار.
عالملر بو تحقیقده لمس اولما سندرومونا مبتلا اولان ناخوشلار اوستونده مطالعه ائله‌دیلر. بو شخصلر دال به دال تانیما و حس پروسه‌لرینی فعال ائتماق گوجلرینی ایتیررلر. عالملر بئله‌نچی انسانلارین دوشونمه‌دیقلاری و ذهنی بوشلوغا مبتلا اولدوقلارینی بیلدیلر. بو شخصلر معمولاً گون بویو ترپشمه‌دن و دانیشمادان بیر یئرده قالارلار. اونلاردان بیر شئی ایستَنیلسه سؤال‌لارا جواب وئره بیلرلر و یا بیر سئری خاطره‌لر یادا سالا بیلرلر آما اونلارین ذهنی سرعتینن سیلینیب بوشالار.
گؤره‌سن بئیینلری هر جور دوشونماقدان بوش اولان بئله شخصلر ده یوخو گؤررلر؟
محققلر 13 نفر سالم شخص و 13 نفر بوجور ناخوشلاردان گونده‌لیق گؤردوقلاری یوخولارینی یازماقلارینی ایسته‌دیلر. محققلر بو یوخولاری اوزونلوق، بوروشوقلوق و عجیب اولما جهتدن تحقیق ائله‌دیلر. عالملرین دئدیغینا اساساً ناخوشلارین هامیسی یوخو گؤرموردو و 13 نفرین فقط 4 نفری یوخو گؤروردو کی بو یوخولار دا سالم شخصلرین یوخولاری اینن مقایسه‌ده چوخ قیسا و ساده ایدی. بو شخصلر یول یئریماق و اوز قیرخماق کیمی معمولی حادثه‌لر باره‌ده یوخو گؤروردولر.
عالملر بو تحقیقده ناخوشلارین داها ساده یوخو گؤرماقلاری و سالملرین بوروشوق و عجیب-غریب یوخو گؤرماقلاریندان بو نتیجه‌یه چاتدیلار کی بوروشوق و عجیب-غریب یوخونون داها بوروشوق بئیین عکس العملینه احتیاجی وار.
یئری وار بو زمینه‌ده داها گئنیش تحقیقلر اولسون.