گؤبه‌لک یوز ایللر بویو جماعتین سفره‌لرینه یول آچمیش غذایی مادّه‌دیر. بو آرادا چینلی‌لر و ژاپنلی‌لار داها چوخ گؤبه‌لک مصرف ائدیرلر.
ایندیه قدر گؤبه‌لگین خاصیّتلری باره‌ده چوخ آز تحقیق اولونوب آما آراشدیرمالار اونون بدنین ایمنلیق سیستمی‌نین گوجلندیرمه‌سی و ویروسی عفونتلر و مختلف سرطانلارین درمانیندا اولان دقّته لایق تأثیریندن حکایت ائلیر.
مهم بیر مسأله‌یه توخونماق لازمدیر: گؤبه‌لک قطعیّاً یاغ و کالری منبعی دئییل. یعنی بیر عدّه‌نین اشتباه تصوّرو کیمی قیرمیزی اتین یئرینی توتا بیلمز.
آما گؤبه‌لکده «پورین» و «پریمیدین» آدلی مادّه‌لر وار کی سرطانلی و شدّتلی یانمیش انسانلارا، الدن گئتمیش سلّول‌لارینی یئنیدن دوزلتمگه، کؤمک ائدیر. گؤبه‌لک یاخجی غذایی منبعدیر.
بیر عدّه بئله اینانیر کی گؤبه‌لک D ویتامی‌نین منبعیدیر آما یاخجی اولار بیلاق کی گؤبه‌لکده بیتکی «استرول» اولان، ارگوسترول ماده‌سی، انسانین قره جیگرینده مخصوص بیر پروسه‌دن سونرا D ویتامی‌نین دوزلمه‌سینه زمینه حاضرلار. انسان، بدنینی ایرمی دقیقه‌دن یاریم ساعته قدر گون معرضینده قویورسا، او مادّه D ویتامی‌نین دوزلتمه‌سینه کؤمک ائلر.
یئری گلمیشکن دئمک لازمدیر کی گؤبله‌لک نوعلاری‌نین غذایی ارزش باخیمیندان فرقلری یوخدور و تقریباً بیردیلر.
اوریک اسیدلری چوخ اولان و نقرس ناخوشلوقلاری اولانلار اوچون گؤبه‌لگین ضرری وار .
یئمه‌لی گؤبه‌لگینن زهرلی گؤبه‌لکلر او قدر بیر-بیرلرینه اوخشارلار کی بعضیلرینی فقط میکروسکوپلی دسگاهلارینان تشخیص وئرمک اولار. بونا گؤره انسان اؤزو گؤبه‌لک ییغماغا اقدام ائله‌مه‌سه یاخشیدیر. گؤبه‌لگی بیر هفته‌یه‌جن یخچالدا ساخلاماق اولار آما اوندان سونرا شیره‌لَنر و خراب اولماغا باشلار. و بو حالدا میگرنی اولان انسانلارا ضرر ائلر.
گؤبه‌لگین پیشیرمگی‌نین لاپ یاخجی نوعو اؤز سویوندا پیشیریب قوورماقدیر. گؤبه‌لگین یوزده دوخسان بئشی‌نین سو اولدوغونا گؤره پیشیرنده اونا سو آرتیرماق لازم دئییل.