اینقیلاب رهبری اینتیخابات مسئوللاری‌نین جمعینده:
چوخلاری چالیشدیلار اینتیخابات دالی دوشسون، ائلیه‌نمه‌دیلر و بوندان سونرا دا ائلیه‌بیلمیه‌جاقلار.
موعظم رهبرلیق مقامی رییس جومهورلوق، شهر و کند شوراسی اینتیخابات مسئوللارین جمعینده تأکید ائله‌دیلر: بو مودّتده چوخلاری چالیشدیلار اینتیخاباتین رنگین آزالتسینلار و یا اونو دالی‌یا سالسینلار آما ایندیه‌جن ائلیه بیلمه‌ییبلر و بوندان سونرا دا آللاهین توفیقی اینن ده ائلیه بیلمیه‌جاقلار.
مهرین وئردیغی خبره گؤره، موعظم رهبرلیق مقامی حضرت آیت الله خامنه ای دوشنبه سحر رییس جومهورلوق، شهر و کند شوراسی اینتیخابات مسئوللارین گؤروشونده، جماعتین خردایدن 24-ده‌کی اینتیخاباتیندا شورلو شیرکتی، اؤلکه ترقیسی و ایستیمراری‌نین ضامینی ساییب و نظارتی اورگانلار، موجریلر و داوطلبلرین قانونلاری بوتون مرحله‌لرده رعایت ائله‌ماغینا تأکید ائله‌دیلر.
اونلار هابئله جلیل‌القدر صحابه، حُجر بن عَدی‌نین مزارینا غوصّه‌لی اهانته ایشاره ائله‌ماغینان تأکید ائله‌دیلر: موسلامانلار و مخصوصاً ایسلام دونیاسی‌نین دینی، سیاسی عالیملری و نوخبه‌‌لری بو چیرکین دوشونجه‌نین قاباغیندا اؤز وظیفه‌لرینه عمل ائله‌سینلر و فیتنه اودونون چوخالماسینا مانع اولسونلار.
اینقیلاب رهبری اینتیخاباتی«بؤیوک و دَیَرلی میلّی و ایسلامی امانت» ساییب آرتیردیلار: نیگهبان شوراسی، نیظارت و ایجرا مجموعه‌لری و اینتیخاباتین سالیم و امنیتلی اولماسینا چالیشان اورگانلار بو بؤیوک امانتین امانتدارلاریدیلار و موهوم، دَیَرلی و قالارگی ایشلر عؤهده‌لرینده وار.
اونلار خردادین 24-ده‌کی اینتیخاباتی کئچمیش اینتیخاباتدان داها موهوم بیلیب آرتیردیلار: ایکی موهوم شورالار و رییس‌جومهورلوق اینتیخاباتی عئینی زماندا اجرا ائله‌ماق آتی اینتیخاباتین موهوم اولان عامیللریندندیر.
اونلار، جماعتین صحنه‌ده‌کی حضورونو اهمیتسیز گؤرستماغا بعضی نتیجه‌سیز چالیشمالارا ایشاره ائله‌ماغینان دئدیلر: بیر عیدهّ چالیشیر اینتیخابات رونقسیز اولسون و یا واختیندا اولماسین آما آللاهین توفیقی اینن ناکام قالاجاقلار و بوندان سونرا دا بیر ایش گؤره بیلمیه‌جاقلار.