قاباق، کولسترول و ایشباع اولموش یاغی اولمایان آز کالوریلی سبزه‌لردن ساییلیر. آما فیبر، آنتی‌اوکسیدانلار، املاح و ویتامینلرله دولودور.
قاباق A،Cو Eویتامینلریله دولودور. بتاکاروتن و آلفا کاروتن، کرپتوگزانتین، لوتئین، زئاگزانتین کیمی پلی‌فنولیک فلاوونوئید ترکیباتی اوچون یاخجی منبع ساییلیر. (کاروتن بدنده A ویتامینینه چئوریلر). B کومپلکس ویتامینلریله دولودور. میس، کلسیوم، پتاسیوم و فوسفور کیمی املاحینان دولودور. قاباق توخومو ایشباع اولمامیش یاغلار و فیبره یاخجی منبع ساییلیب اورگه فایدالیدیر. قاباغی گؤیچولردن آلا بیلرسیز.
آلاندا دیقّتیز اولسون الیزده آغیر اولوب ایچی دولو اولسون هابئله دریسی ساغلام و قیوریشمامیش اولسون. قاباغی کسدیکدن سونرا یخجالدا ساخلایین. بئله‌لیکله هر دیلیمین نئچه گون بویو ایستیفاده ائده بیلرسیز. قاباغی آلاندان سونرا تر-تمیز یویوب آرادان ایکی بؤلوب توخوملارینی چیخارداندان سونرا دیلیم دیلیم ائدین. اونو موختلیف صورتلرده پیشیره بیلرسیز آما لاپ یاخجی یول اون بوخاردا پیشیرمکدیر. چینده قاباغین یارپاقلارینی آشا و سالادا قاتارلار. بعضی اؤلکه‌لرده قاباقدان شیرنی و کیک پیشیررلر. قاباق ناگتی‌ده خوروشلار و آشلاردا ایشله‌نر.
آرتیریت درمانی
قاباق توخومو مَفصللرین آرتیریتینی آزالتماقدا فایدالیدیر. اونون بو زمینه‌ده کی تأثیرینی ایندومتاسین کیمی آرتیریت داوالارینان موقاییسه ائدرلر، بو فرقینن کی قاباق توخومونون عَواریضی یوخدور.
خوش خاصیّتلی پروستات
قاباق توخومو خوش خاصیّتلی پروستات درمانی‌نین بیرینجی و ایکینجی مرحله‌سینده ایستیفاده اولار. خوش خاصیّتلی پروستات بیرینجی مرحله‌ده ناخوشو گئجه‌لر نئچه دفعه یوخودان آییلدانا قدر سودوک دفعی‌نین سایی چوخالار. ایکینجی مرحله‌ده مثانه‌نین فعالیتی چوخ ضعیفلر و سودوک کامیل صورتده دفع اولماز. قاباق توخوملاری تحریک اولان مثانه‌نین توختاماسینا فایدالیدیر.
هابئله اوشقلاردا مثانه داشی‌نین یارانماسینا مانع اولار. بولغاریستان، تورکیه و اوکراین کیمی اؤلکه‌لرده کیشیلر قدیم عادتلره گؤره پروستاتا موبتلا اولماسین دئیه اوشاقلیقدان قاباق توخومو یئیرلر. قاباق توخوملاریندا «تستوسترون»ون «دی‌هیدروتستوسترون»ونا تبدیل اولماسینا مانع اولان «کیوکربیتاسین» آدیندا شیمیایی مادّه وار. دی‌هیدروتستوسترون اولماسا پروستات سلّول‌لارین یارانماسی چتینلشر.
افسورده‌لیق
قاباق توخوموندا اولان «ال – تریپتوفان» ماده‌سی افسورده‌لیق ناخوشلوغونا درماندیر.
بؤیرک داشی
قاباق توخومو یئمک، بؤیرک داشی‌نین لاپ شایع داشی اولان «کلسیوم اوگزالات» داشی‌نین یارانماسینا مانع اولار. بو توخوملار سودوکده داش یارادان مادّه‌نین سطحینی آزالدار. گونده 10گیرم قاباق توخومو یئماق بؤیرک داشی‌نین یارانماسینا مانع اولار.
سوموکلردن موحافیظه
یاش چوخالدیقجا سوموک پوکالما احتیمالی چوخالیر و قوجالار «روی» مادّه‌سی اولان یئمکلردن ایستیفاده ائله‌مه‌لیدیلر. قاباق‌دا دا بو مادّه بوللو میقداردا وار.
قاباق چین فرهنگینده فروانلیق و ریفاه رمزی کیمی ساییلیر. بو سبزه بیرینجی دفعه هیندوستاندا تاپیلدی و ایندیلیکده دونیانین هر طرفینه یاییلیب.