نئچه گون آختاریشدان سونرا روس عالیملری،جومعه گونو روسیهده اورالین گؤیونده پارتلایان گؤی داشی‌نین تیکه‌لرینی تاپماغا موفق اولدولار.
فرانسه خبرگوزاریسی‌نین وئردیغی خبره گؤره، روس عالیملری چلبیانسك شهری و اورالین اوستونده پارتلاییب بو منطقه‌نین موختلیف یئرلرینده یئره دَیَن گؤی داشی‌نین بعضی تیکه‌لری‌نین تاپماسینی دئییبلر.
روسیه‌نین فوق‌العاده حاللار ویزارتی یکشنبه گونو اعلام ائله‌میشدی: بو گؤی داشی‌نین قطعه‌لری‌نین دوشمه احتیمالی اولان چرباركول دریاچاسی‌نین غواصلار طرفیندن آختاریلماسی نتیجه وئرمه‌دی.
آما منطقه‌یه یوللانان اورال دانیشگاهی‌نین عالیملری بو گؤی داشی‌نین 50 تیکه‌سینی چرباركول دریاچاسی‌نین یاخینلیغیندان تاپدیلار. تاپیلان تیکه‌لر یكاترینبورگ شهرینه یوللانیبلار.
علوم آکادمیسی عضوی و بو هیأتین رییسی ویكتور گروخفسكی‌نین دئدیگینه گؤره، تاپیلان تیکه‌لر بو گؤی داشی‌نین 'كندرایت'لر نوعی و یا همان داش جینسیندن اولماسینی بللی ائدیب. اونون یوزده اونونو دمیر تشکیل وئریردی.
ویكتور گروخفسكی دئدی: بو گؤی داشی 'چرباكول گؤی داشی' آدلانیب. اونون کیچیک تیکه‌لرینی دریاچانین قیراغیندا تاپدیغیمزا گؤره اصلی قطعه‌لری‌نین چرباكول سولاری‌نین درینلیغیندا اولما احتیمالی وار.