چوخداندیر کی عالیملر یئرین
قابیغینی دلماغا مشغولدولار, آما هله یئرین اتی‌نین یاخینلیغینا بئله چاتماییبلار.
ایندی شوجاعتلی بیر طرح جریاندادیر کی اینسانی یئرین بو یاپیشقان لایه‌سینه چاتدیرا.
کیفایت قدر پول و شوجاعتین
اولماسی‌اینن دونیانین لاپ بؤیوک مته‌سی‌نین اوستونده ایشله‌ین عالیملر ائلیه
بیلرلر 2020-ده یئرین اتینه بیر دلیک آچالار و اوندان بیر سئری نمونه‌لر گؤتوره‌لر
کی شاید سیاره‌میزین منبعیندن ایپ اوجو تاپالار.
پاپ‌ساینسین وئردیغی خبره
گؤره, یئرین داخیلینه ال تاپماغا نیسبتاً نازیک قابیغینی دلماق لازیمدیر و اونون اوچون
اوقیانوسون تکیندن هئچ اولماسا 6 کیلومتر آشاغی یئنماق لازیمدیر. بو ایش اوچون گرک
بیر عظمتلی گمی اوقیانوسون لاپ درین نوقطه‌سینده مهار اولا. عالیملرین قصینده
اولان بو دلیگین اَنی تکجه 30 سانتی متر اولاجاق, بونونلا بئله بو ایش اوچون بیر
میلیاد دولار هزینه لازیمدیر.
بو ایش اوچون نظرده آلینان
گمی ژاپونون Chikyu گمیسدیر کی ایندیه‌جن اوقیانوسون تکینده 3500 متر درینلیگینده
دلیک قازیب. چیکونون بوندان آرتیق درینلیکلره چاتماغا گوجو وار. آما بونونلا بئله
یئرین اریمیش مرکزینه چاتمامیش گرک قازما تکنولوژیسی یاخجیلاشا. چیکونون مته باشی
فقط 60-50 ساعت دوام گتیریر و اوندان سونرا یئرینه تازا مته قویماق لازیم اولور.
دیمون تیگل, انگلستانین ساوت‌همپتون
دانیشگاهی‌نین عالیمی بو ایشی چوخ چتین ساییر. او دئییر: «ایسته‌ساق موقاییسه
ائدک, بو ایش اونا بنزیر کی اینسانین توکو نازیکلیگینده بیر پولاد ساپی بیر
ایستخرین تکینه آپاراسان و سونرا اونونلا 0.1 میلی‌متر قالینلیغیندا اولان اوزوگو دله‌سن.»
یئر قابیغیندا دلینمیش لاپ
درین دلیک 12376 متر اولوب کی روسیه‌نین شرقینده قازیلیب. بو دلیک یئرین اتینه
چاتماییب و هم‌ده قاییم صورتده دلینمه‌میشدی.(بونو دلمکدن منظور نفته چاتماق‌ایدی.)
آما بو دلیک و بونا تایلاری گؤرسدیر کی شاید یئرین مرکزینه دلیک دلماق ایمکانلی
بیر ایش اولسون.