قانسیزلیق او موشکوللردندیر کی خانیملارین چوخو اونا موبتلادی آما چوخونون اوندان خبری یوخدور. حقیقتده قانسیزلیغین اکثراً علامتی اولمور و بعضاً آیری ناخوشلوغون علامتلری‌اینن قاریشیق دوشور.

قانسیزلیغین تکجه تشخیص یولو قان آزماییشی اولسا دا بوردا بو ناخوشلوغون 10 علامتی ذیکر اولور کی اونلاری تشخیص وئرسز فوراً دؤکتوره گئدین.

1. دری‌نین رنگی آتیب: قانسیز اولاندا بدنیزین دریسی طبیعی رنگده اولسا دا دوداقلاریزین رنگی طبیعی رنگدن آچیق اولسا و یا بدنیزین دریسی خسته و سوست اولسا بو او دئماقدیر کی قانسیزسیز.

2. همیشه یورقونلوق احساسی: همیشه یورقونلوق احساس ائدیرسیز و حیس ائدیرسیز کی قاباقکیلارا تای گوجوز یوخدور؟ نظریزه گلیر کی گون بویو دایانیرسیز؟ بو قانسیزلیغین آشکار نیشانه‌سیدیر. افسورده‌لیغین مین بیر روانی و فیزیکی عیلّتی‌ده اولسا, بو قانسیزلیغین موهوم علامتلریندن ساییلیر.

3. باش آغریسی و ایشتهاسیزلیق: قانسیزلار گون بویو باشلاری آغرییار و معمولاً غذایا مئیللری اولماز. بونلار قانسیزلیغین بیرینجی علامتلریندندیر.

4. خوشکیّت: بو دا قانسیزلیغین علامتلریندن ساییلیر و یئماق عادتلرین دگیشمه‌میش اورتایا گلر. مثلاً گؤی و میوه مصرفین آزالتمامیش یارانار.

5. دیقّتین آزالماسی: قانسیز اولساز گونده‌لیق مسأله‌لره دیقّتیز آزالار و ایشلریزی گؤرمک چتین اولار.

6. عجیب تغذیه: قانسیزلارین عجیب خاصیّتی وار کی تورپاق و کاغاذ کیمی یئمه‌لی اولمایان زادلاری یئسینلر. بو حالا «پیکا» دئییلیر و قانسیزلیغیزین موعالیجه‌سی اوچون فوراً دؤکتوره گئتمه‌لیسیز.

7. دیلیزده و آغزیزدا بیردن-بیره یارا گؤروشسه و یا اگر خانیم اولساز آیلیق عادتیز بیردن قطع اولسا, نیشان وئریر کی قانسیزسیز.

8. تنگی نفس: بو بیر جیدّی هوشداردیر. قانسیزلیغیزین شیدّتی چوخالاندا تنگی نفسه دوچار اولارسیز. نیه کی قانین نفس چکمه پروسه‌سینی ساغلایان قیرمیزی گلوبوللار آزالسالار قانا اوکسیژنین یئتیشمه‌سی آزالار. بو علامت اورتا و یا شیدّتلی اولا بیلر.

9. سویوق بارماقلار: ال-آیاغیز همیشه سویوق اولسا قانسیزسیز. بو مسأله اوردان یارانار کی قانین آزلیغینا گؤره ال و آیاغا قان آز یئتیشر.

10. ضعیفلیق و باش گیجللنمه: بتر قانسیزلیقدا سحر آیاغا دوراندا چوخ ضعیفلیق حیس ائدیرسیز و یا باشیز گیجللنیر.