آری‌ایله موعالیجه دونیادا طبیعی
موعالیجه یوللارینداندیر کی اوزاق ایللردن چین و یونان جماعتی اوندان ایستیفاده
ائدیردی و بویون‌ده شیمیایی داوالارین جانیبی عاریضه‌لرینه گؤره, بو طرز موعالیجه
اوروپا و آمریکا اؤلکه‌لرینده آز خطرلی موعالیجه طرزی کیمی راییج اولوب. اخیر
ایللرده اؤلکه‌میزده‌ده راییج اولان بو طرز موعالیجه‌ده آری و اونون تولید
ائله‌دیغی محصوللاردان او جومله‌دن: بال, آری سوتو , گول توزو و مومدان موختلیف
ناخوشلوقلارین موعالیجه‌سینه ایستیفاده اولار. موتخصیصلر بو طرزین مُوَفقیتینی
موختلیف ناخوشلوقلارین او جومله‌دن عصبی سیستمین ناخوشلوقلاری, ام.اس, زونا,
روماتیزم, آرتریت و افسورده‌لیغین موعالیجه‌سینده ثابیت ائدیبلر. شکسیز بو طرز
موعالیجه طبیعی موعالیجه یوللاری‌نین بیریدیر کی ناخوشی شیمیایی داوالارین مصرفی و
ایندی راییج اولان موعالیجه طرزلریندن احتیاجسیز ائلیر.
آری ایله موعالیجه هر ناخوشا
جواب وئرمز
آری ایله موعالیجه ائدنلر,
ناخوشلارینی بو طرزله موعالیجه ائله‌ماق اوچون اونلاری موعایینه ائدیب بدن
خصوصیتلری‌نین بو طرز موعالیجه‌یه جواب وئرمه‌سینی بیلندن سونرا ایشه باشلیرلار.
موعالیجه‌چیلر ناخوشون موعایینه‌سیندن علاوه اونون شرح حالین سوروشورلار و اونون
تغذیه‌سی و هضم سیستمی‌نین نئجه ایشله‌مه‌سی و گونده‌لیق ورزیشی باره‌ده ایطیلاعات
آلیرلار و اونون فعالیتلری‌نین موناسیب اولماسیندان موطمئین اولاندان سونرا
موعالیجه‌سینه حاضیرلانیرلار. عین حالدا اونلار ناخوشلارینا توصیه ائدیرلر کی
موعالیجه‌نی باشلایاندان سونرا ایسترسلی موحیطلرده اولماسینلار.
آری‌نین سانجامسی اینن
موعالیجه اولون
موعالیجه‌چیلر افرادین
ناخوشلوقلارینا موتناسیب آری سانجماسی, آری زهری و یا آری‌نین آیری محصوللاریندان
ایستیفاه ائدیرلر. بو موعالیجه‌چیلر خاص و کونترول اولونموش شراییطده آری‌نین طبیعی
سانجماسی و یا زهرینی, سطحی صورنده بدنه وارید ائدیب موعالیجه‌یه ایقدام ائدیرلر و
ناخوشون مودافیعه سیستمینی تحریک ائله‌ماغینان بو سیستمین تنظیم و موتعادیل
اولماسینا کؤمک ائلیرلر. حقیقتده اونلار بال آریسی‌نین زهری اینن بدنده آنتی بادی
تولدی ائلیرلر و بدنین مودافیعه سیستمینی یوخاری آپاریرلار. بئله‌لیغینان بدنین
مودافیعه سیستمی آری‌نین زهری اینن موباریزه اوچون تحریک اولور و بو سیستمین تحریک
اولماسی‌اینن بدن ام.اس کیمی آیری ناخشلوقلارین قاباغیندا دا قودرت
تاپیر.
بو نوکته‌لره دیقّت
ائدین
آری اینن موعالیجه‌یه باشلامامیشدان بونلارا عمل ائله‌مه‌لیسیز. بو
نوکته‌لری رعایت ائله‌مه‌ماق سیزین اؤلوموزه مونجر اولا بیلر. تزریق اولان یئری
تمیزله‌ماق اوچون دیفن هیدرامین کیمی الکولی اولان ماده‌لردن ایستیفاده ائتمه‌یین,
چونکی آری زهری اصلاً الکولونان توتماز. حامیله‌لیق و پریود زمانی بو موعالیجه‌دن
ایستیفاده ائتمه‌یین.
بو عاریضه‌لر
طبیعیدیر
آری اینن موعالیجه‌نین بیر
سئری عاریضه‌لری وار کی ائله‌ده نیگران ائدن دئییل. مثلاً آری اینن موعالیجه‌دن
سونرا یوخو ایختیلالی, قاشینما, اورک بولانما و قیزیشما اولا بیلر کی نیگرانچیلیق
یئری یوخدور و بیر ایکی گونه‌جن آرادان گئدرلر. تزریق یئری‌نین قاشینماسینی
آزالتماق اوچون یوغورت و سیدر خمیری فایدالی اولار.