آنالار حامیله‌لیق زمانیندا
هیپوتیروئیدلری اولسا (تیروئیدلری آز ایشله‌سه) دونیایا گلن اوشاغین IQسی آشاغی اولار.
حامیله‌لیغا قصدلری اولانلار و
یا حامیله اولانلارین گرک تیروئیدلری آزماییش اولسون چونکی تیروئیدین آز
ایشله‌مه‌سی اوشاغین IQسینا چوخ تأثیر
قویار.
بو ناخوشلوغون آدی «هاشیموتو»دور و
خانیملاردا نیسبت آقالارا گؤره داها چوخ شایع اولور.
تیروئیدین آز ایشله‌مه‌سی‌نین نئچه
عامیلی اولا بیلر او جومله‌دن: تیرئید جراحلیغی و اونون بیر پارچاسینی گؤتورمک,
تیروئیدین چوخ ایشله‌مه‌سینه گؤره رادیواکتیو یودون تزریقی و نهایتده یودون آزلیغی.
بعضی آنزیم ایختیلال‌لاری دا تیروئید هورمونلارین دوزلتمه‌سینده ایختیلال یارادیب و
تیروئیدین آز ایشله‌مه‌سینه باعیث اولورلار.
تیروئیدین آنادان گلمه آز ایشله‌مه‌سی
بونا خاطیر اولور کی جنین دورانیندا تیروئید غودّه‌سی تشکیل تاپمیر.
تیروئیدین آز
ایشله‌مه‌سی‌نین نیشانه‌لری
تیروئیدین آز ایشله‌مه
علامتلری موختلیف یاشلاردا فرقلی اولور. دری‌نین قورولوغو, اوشوماق احساسی, وزنین
موختصر چوخالماسی, خوشکیت, خانیملارین پریودلاریندا ایختیلال, توکلرین و بعضاً
قاشلارین توکولمه‌سی, قاندا یاغ و فیشارین چوخالماسی, تنگی نفس, ضعیفلیق,
یورقونلوق, حالسیزلیق, دیقّتین آزالماسی, عَضوله‌لرین توتولماسی, بئل آغریسی, اورک
دؤیونوشون آزلیغی و بعضاً افسورده‌لیق تیروئیدین آز ایشله‌مه
علامتلریندندیر.
تیروئیدین آز ایشله‌مه‌سی جوانلیقدا
یارانسا ایمکانی وار علامتلری واضح گؤروشمه‌یه.
کؤرپه‌لرده تیروئیدین آز
ایشله‌مه‌سی کؤرپه‌نین ساریلیغی‌نین اوزونا چکمه‌سی, خشین آغلاماسی, تغیذیه و سوت
یئمه‌سینده ایختیلال یارانما, بؤیوک دیل و خوشکیتینده گؤروشر کی واختیندان تشخیص
وئریلمه‌سه اوشاغین روشدی و بئینی‌نین کامیللشمه‌سینه جوبران اولمایان صدمه
وورار.
کؤرپه‌لرین هامیسی ایکینجی گوندن
بئشینجی گونه‌جن الکلنمه‌لیدیلر چونکی ایمکانی وار بعضی کؤرپه‌لرده اصلاً تیروئیدین
آز ایشله‌مه علامتی گؤروشمه‌سین.
تیرئیدین آز ایشله‌مه‌سینی
نئجه موعالیجه ائتمک اولار؟
تیروئید هورمونونون بدن
سلوللاری‌نین ماده موبادیله‌سینده چوخ نقشی وار و بدنده تیروئید هورمونو آزالسا,
سلوللارین ماده موبادیله‌سی موختل اولار و بدنین حیاتی ایشلری
یاواشلار.
بو ناخوشاوغون درمانی داوا
اینن اولور. تیروئید غودّه‌سی شیدّتلی صدمه گؤرسه و اؤزونو ترمیم ائله‌ماغا گوجو
چاتماسا, ناخوش گرک عؤمرونون آخیرینه‌جن داوا یئیه آما بعضی موریدلرده تیروئید
ترمیم تاپار و موعالیجه‌نین ایدامه‌سینه احتیاج اولماز.