تازا موطالیعه‌لر گؤرسه‌دیر کی
آسقیرماق سینوسلار و بورون دلیکلرینده اولان سنسولارین حرکتینی‌نین سورعتینی
چوخالدیر و خاریجی ذره‌لری داها راحات ائشیگه آتیر.
بیلیریک کی آسقیرماق نفس آلما
سیستمی‌نین موزاحیملرینی و میکروبلاری ائشیگه آتماغا کؤمک ائلر و هاوادا داغیدار.
آما موطالیعه‌لر گؤرسه‌دیر کی آسقیرماغین آیری ایشلری‌ده اولا بیلر.
توز-تورپاق کیمی بالاجا خاریجی ذره نفس
چکدیگیمیز هاوا اینن بیرلیقدا نفس آلما سیستمی‌میزه داخیل اولاندا سینوسلار و بورون
ایچینده‌کی سنسورلار فعال اولار و اونو ائشیگه آتماغا آماده اولار. نوام کوهن,
پنسیلوانیا دانیشگاهی‌نین قولاق, بوغاز و بورون موتخصیصی نشنال
جئوغرافیک مجله‌سینه دئییر: «بو پروسه‌نین همیشه بیر باشلایانا احتیاجی اولار کی
بیزیم موطالیعه‌لریمیز گؤرسه‌دیر همن آسقیرماقدیر. حقیقتده آسقیرماق تکجه نفس آلما
یولونو تمیزله‌میر بلکه سنسورلاری فعال ائلیر کی ایکی دقیقه‌یه‌جن سورعتلی حرکت
ائتسینلر کی موزاحیمی خاریج ائله‌ماق و یا هضم سیستمینه اؤتورماغین شراییطین
حاضیرلاسین.
بو سنسورلار کی میکروسکوب آلتیندا
زیبر فرشه اوخشورلار همیشه حرکتده‌دیلر و ائلیه بیلرلر خاریجی موزاحیملری آغ
جیگرلردن نفس آلما یولونا طرف آپارسینلار. بو ذره‌لر بو یوللارین طریقی ایله ائشیگه
هیدایت اولورلار و یا هضم سیستمینه وارید اولوب معده اسیدی‌اینن آرادان
گئدیرلر.
بو سنسورلار ایشله‌ماقلارینا گؤره
موخاطا احتیاجلاری وار کی بوروندا ترشوح اولونو. بیلمگی جالیبدیر کی بورون
سلوللاریندا ترشوح تاپان موخاطین گونده‌لیق میقداری بیر لتیرجن اولار کی اونون
چوخونو شخص اودار.
کوهن و همکارلاری بیلیردیلر کی
سینوزیت ناخوشلوقلاری اولانلار بونونلا بئله کی چوخ آسقیریرلار آما یئنه‌ده ایضافه
موخاطلارینی اؤز نفس‌آلما یوللاریندان تمیزله‌یه بیلمیرلر. اونلار بئله حدس
ووردولار کی بئله ناخوشلاردا آسقیرماق, سنسورلاری فعال ائله‌ماق خاصیتینی الدن
وئریب.
بو فرضیه‌نی آراشدیرماق اوچون سالیم
و سینوزیتلری اولانلارین سینوسلاریندان سلول آییردیلار و نئچه هفته انکوباتوردا
ساخلادیلار کی همن سینوسداکی بافت یارانسین. سونرا هاوانی بو سلول اولان فضایا
پوفله‌دیلر کی سنسورلارین آسقیرماغا اوخشایان هاوا آخینی موقابیلینده عکس‌العملینی
گؤرسونلر و موقاییسه ائتسینلر. آزماییشلر گؤرستدی کی هاوا آخینی سلوللارا یاپیشان
سنسورلارین حرکت سورعتینی چوخاتدی؛ آما سینوزیتلی بافتلاردان یارانمیش سنسورلارین
سورعت دنگه‌سینه اثری اولمادی.
کوهن دئییر: «بو موطالیعه گؤرسه‌دیر کی
ساغلام سلوللارینان سینوزیتلی سلوللارین عکس‌العمل‌لری فرقلیدیر. شاید موزمین
عفونتلر بو سنسورلارین دوزگون فعالیتی‌نین قاباغین آلیر.»
سینوزیت ناخوشلارینا قطعی درمان یوخدور. فقط آمریکادا 15 میلیون‌جن
اینسانین سینوزیتی وار و اکثراً داوا و یا جراحلیغینان اونون اثرلرینی آزالدیرلار.
بو ناخوشلارین اییله‌مه و دادما حیسّلری آزالا بیلر و اوزلرینده شیش اولا بیلر.
کوهن و همکارلاری‌نین اومیدی وار بو تحقیق, تازا درمان یولو تاپماغا کؤمک
ائله‌سین.