جام جم آنلاین: تحقیقلر گؤرسه‌دیر کی
تقریباً 15 میلیون ایل بوندان قاباق, سابیقه‌سیز ایستی کئچیجی صورتده جنوب قوطبونا
اثر قویدو. هاوانین بو حدده قیزیشماسی جنوب قوطبون یاشیل سیماسینی
دگیشدی.
جنوب قوطبونداکی بوز داغلاری تقریباً 34
میلیون ایل بوندان قاباق دوزلیبلر, آما یاواش یاواش هاوانین قیزیشماسی‌اینن بوگونکی
نیوزلند و شیلی آدلانان یئرلر توندرا کیمی اولدولار. هاوانین قیزیشماسی جنوب
قوطبوندا ساحیل و مخروطی آغاجلاری وجودا گتیردی. سارا فیاکینز بیر شیمی
موتخصیصی‌دیر کی زمین شناسی‌نین موختلیف دؤره‌لرین وضعیتلرین تشریح
ائله‌ماق اوچون شیمی علمیندن و اونون موختلیف حیوانلار و گیاهلار اوستونده‌کی
تأثیریندن ایستیفاده ائلیر.
بو موحقیق جنوبی کالیفورنیا
دانیشگاهی‌نین تحقیق گروهونون رئیسی‌دیر کی اخیراً حیرت آمیز مدرکلر تاپیب. راس
آدیندا مساحتی 187 مین کیلومتر موربعدن چوخ اولان بوز لایه‌سی‌نین قالیقلاریندان
چوخ میقداردا یاغلی یارپاقلار تاپیلیب.
قالیقلار میوسن دؤره‌سینده, یعنی بیر
دؤران کی هاوا نیسبتاً موعتدیل ایدی, جنوب قوطبوندن خاریج اولوب و نهایتده
اوقیانوسا گئدیب. بو حادیثه 15-20 میلیون ایل قاباق اولوب. پروفوسور فیاکینز دئییر
کی بو یارپاقلارین اؤزلریندن علاوه کی جنوب قوطبی ساحیللرینده چوخلی گیاهلارین
اولماسیندان خبر وئریر, بو قالیقلارین شیمیایی آنالیزی گؤرسه‌دیر کی او زمان هاوا,
قاباقجادان گومان ائله‌دیغیمیزدان داها چوخ ایستی‌ایدی.
بو تحقیقلرین نتیجه‌سی گؤرسه‌دیر کی میوسن
دؤره‌سینده هاوا ایندی‌نین میانگینیندن 11 درجه چوخیدی.
پروفوسور فیاکینز دئییر: بیز
بیلیردیک کی میوسن دؤره‌سی ایستی بیر دؤره‌ایدی آما حیرت آمیزدیر کی ایندی بیلیریک
بو قدر ایستیدی.
یاغلی یارپاقلار کئچمیشین هاوا
وضعیتین گؤرسه‌دیرلر. بیر گیاه اؤلنده اونون چوخ قیسمتلری تجزیه اولار. آما اونون
موم شکلینده اولان قیسمتی و توز دانالاری کی بوردا ایصطیلاحاً یاغلی بخشی دئییریک,
آرادان گئتمیرلر و مختلیف قالیقلاردا تورا دوشورلر و مولکول فوسیلی کیمی
قالیرلار.