تمبلليق چوخلي ايجتيماعي و فرهنگي
ضررلرين منبعي اولا بيلر و جاميعه‌ده‌كي چاتيشمامازليقلارين چوخونون تمبلليغينان
موستقيم رابيطه‌سي وار.
انگلستاندا ايكي بهداشت ايش‌بيلني
پيشنهاد وئريبلر كي فيزيكي فعاليته تمايولي اولمامازليغي و آيري سؤزله تمبل‌ليغي
بير ناخوشلوق بيليب ناخوشلوقلارين گروهلاريندا يئرلشديرك.
دؤکتور ریچارد ویلر و دؤکتور ایمانوئل
استاماتاکیس بو فيكري، بو توجيهينن وئريبلر كي تحروكسوزلوق و ناخوشلوق آراسيندا
گوجلو رابيطه وار.
بو ايكي موحقيق اؤز موطاليعه‌لريني
انگلستانين «ورزيش طيبّي» مجله‌سينده بئله توضيح وئريبلر:
بونا ديقت يئتيرماغينان كي آز ترپشماق و
اؤلوم آراسيندا رابيطه وار، پيشنهاد ائليروق ترپشمه‌ماق بير جور ناخوشلوق
تانينسين.
دؤكتور ويلر بو باره‌ده دئدي: اينديليكده
كؤكلوق، بين‌الميللي بهداشت سازماني طرفيندن ناخوشلوق حئسابلانير آما كؤكلوغون
اؤزو آيري موهوم عاميلين نتيجه‌سي‌دير كي اودا ورزيش ائله‌مه‌ماق و ترپشمه‌ماقدير.
ايرانليلار؛ دونيادا ايجتيماعي تمبل‌ليغين
اوچونجو روتبه‌سينده
ايجتيماعي و فرهنگي عادتلريميزين چوخونون
ريشه‌سي ايجتيماعي تمبل‌ليقدادير. ايرانليلار بونونلا بئله كي دونيانين تمبلليق
متوسيطيندن يوخاريداديلار، اوچونجو يئري اؤزلرينه گؤتوروبلر.
ائله بو اسادا بيزيم اؤلكه‌ده آغ يخه‌ليق
فرهنگي قبول اولوب. يعني اينسانلار درس اوخورلار كي ايشله‌مه‌سينلر و درس
اوخومايان ايشله‌مه‌ليدير. يعني ايشدن قاچماق بير جور ياشاماقدير. جاميعه‌ده كي بو
منفي خيصلتلر، خوشا گلمز خصوصيته تبديل اولوب.
ايراندا كيتاب يئرينه تيلويزيونا
باخماغين يوخاري آماري و دولتي ايشلرده ايستيخدام اولماغا يوخاري تمايول (ميز
داليسيندا اوتورماق) هابئله ايش باشارما و ايش يارالتماغا تمايولون اولماماسي و
تعطيل‌لرين چوخ اولماسي بو خصوصيتلرين بير آزيدير.
تقديره تسليم اولماق (فالچيلارا، باخيجي‌لارا
و . . . اوز گتيرمك)، گله‌جاغا ايفراطي صورتده ديقّت يئتيرمك، بير گئجه‌ليق و تئز
نتيجه وئرن ايشلره ماييل اولماق، اؤز مئحورليق، فردي منفعتلره گؤره مسئوليّتدن
قاچماق، گوجسوزلوق احساسي و ناهنجارليق او جومله معيارلارداندير كي شخصين تمبل‌ليغينا
حئسابلانير.
بو زمينه‌ده تهراندا آپاريلان تحقيقده
بللي اولوب كي: 3328 نفر جوانين 45 درصدي فردي تمبل‌ليغا موبتلادير.
بو تحقيق اساسيندا، يوخاري گلير صاحيبي
اولماغا خاطير تحصيلدن ايستيقبال ائله‌مه‌مك، توليد يئرينه دلّال‌ليغا طرف گئتمك
جاميعه‌ميزده كي بو رفتارين باريز نمونه‌سيدير.
تمبل‌ليغي آرادان آپارماغين يوللاري
1. ايمكان داخيلينده باخين گؤرون هانسي
موشكول سيزي دالي ساخلاييب. معمولاً او موشكول گؤروندوغوندان بالاجادير و اونون
حلّي فيكر ائله‌ديغيزدان داها راحاتدير.
2. ايندي او موشكول و يا هدفين اهميّتينه
دوشونون. آيا اونو گؤرمه‌ديم حئسابلايا بيلرسيز؟ آيا اونو ياددان چيخارديب آيري
ايشين داليسيجان گئده‌بيلرسيز؟
3. او كسلر كي اؤزلرين تمبل بيليرلر،
اوشاقليقداكي افسورده‌ليقلارين و ناراحاتليقلارين تازادان ديريلديرلر. احتياجي
يوخدور كئچميشه جوماسيز. آما اگر احساس ائليسز كي گونده‌ليغا دوچار اولموسوز،
فعاليّتيزي چوخالدين، تازا بير ايش باشلايين و اؤزوزه دئيين: «قديم كي عادت اولا
اولا من ايندي يئريمدن دوروب فايدالي بير شخص اولا بيله‌رم.»
4. ايشي باشلاماغا تصميم توتون. گوره‌جاقسيز
كي چوخ راحات اونو قورتاريرسيز.
5. فقط ايشين اوستونده موتمركيز اولون،
نه موشكولون.
6. بونو دئماغينان كي: «من ايستيرم بو
ايشي گؤرم؛ ائله ايندي ايستيرم بو ايشي گؤرم! پس ايشه باشليرام و دينجلماغي
سونرايا ساخليرام» اؤزوزو يولا سالين. بو جومله‌ني اوجادان دئيين، گؤره‌جاقسيز كي
چوخ تئز او ايشي باشلاميسيز.
7. ايشين بالاجا بؤلوملرين قورتارماق
سيزده ياخجي روحيه يارالدار. اؤز اؤزوه دئيين: «آفرين. احسن، ائله آخيره‌جن بوجور
گئد.» كيچيك هدفلر و مقصدلره طرف ايشله‌ماق موفقيّتين سيرّي‌دير. بؤيوك ايشلر نئچه
كيچيك ايشين بيرلشمه‌سيندن يارانير.
8. بالاجا موفقيّتلريز اوچون اؤزوزه
حتماً جايزه وئرين. قاباق گون گؤرمه‌ديغيز ايشي گؤرماغا تصميم توتساز بيلين كي
ياخجي بير جايزه‌يه احتياجيز وار. هر ايشين قورتارماسينا گؤره اؤزوزه جايزه وئرين
تا يولون ايدامه‌سينه انگيزه‌ز اولسون.
9. بوردا تسليم اولمايين. غلتك اوستونه
دوشمك چوخ چتيندير، پس غلتگه دوشندن سونرا راحاتليغينان اونون اوستوندن دورمايين.
موفقيّتلر آراسيندا نه قدر وقفه اولسا، تازادان باشلاماق بير او قدر چتين اولاجاق.
آما سونرا كي مقصدي نه قدر تئز باشلاساز، بير او قدر اؤزوزه اعتيماديز چوخالاجاق و
بو اعتيماد باعيث اولاجاق احساس ائليه‌سيز كي هر ايشي گؤره بيلرسيز.
10. انگيزه تاپماق بير شئيدير آما يول
بويوندا چتينليقلارينان اوزله‌شنده، اونو ساخلاماق آيري بير شئيدير. موشكوللردن هر
نه قدر اوزاق اولساز، اونلارا تسليم اولماق احتيمالي چوخالار.
11. دينجلماغا حاضير اولماساز،
دايانمايين و دينجلماغا اوتوراندان سونرا دا ايشه تازادان باشلاماغا وقت تعيين
ائله‌يين.
12. اؤزوزه اوزون مودّت مقصدلر تعريفله‌يين.
اؤزوز اوچون هدفيز اولسا بير شئي وار كي اونا طرف گئده‌سيز. اؤزوزه بؤيوك هدفلر
نظرده آلين كي دوزگون انگيزه وئرسين. دوشونون كي واقيعاً نه آختاريسيز. آلچاق
هدفلر سيزه انگيزه وئرمز. گونده‌ليق ايشلريزدن بير ليست يازين كي هم كيچيك و هم
بؤيوك ايشلر اولسون. ليستده‌كي ايشلري اهميت باخيميندان ترتيبله‌يين.
13. هابئله بوتون كيچيك ايسته‌ديقلاريزدان
بير ليست يازين مثلاً تازا پالتار، ائوه تازا موبلومان، يا حتّي بير گولدان. كيچيك
هدفلريز هميشه ذهنيزده اولسا، اونلاري يئرينه يئتيرماغا انگيزه‌ز چوخ اولار.
نوكته‌لر
* خيال گوجوزدن ايستيفاده ائدين و
چيگينلريزده كي فيريشته و شيطاني تتجسّوم ائدين. ايشلري بو تجسّومله قاباغا
آپارساز، فيريشته شيطاندان داها چوخ موفق اولار.
* ايشيز اولماسا دا يا صوبح اوّل وقت ائودن
ائشيگه چيخماساز دا، ساعتيزي سحر تئزه قورون مثلاً ساعت 7-يه. دوش توتون، پالتار
گئيين و ديري‌باش اوتاقدان چيخين. هميشه ائله پالتار گئيين كي ائله بيل ائشيگه
چيخيرسيز. يوخودان دورماق همن تختيزي مورتب ائدين.
* ورزيش ائدين. هفته‌ده نئچه گون قاچماغا
و يا يئريماغا ائودن ائشيگه چيخين. چوخ تئز گؤره‌جاقسيز كي اوّلكيندن داها بشاش و
ديري‌باشسيز. ورزيش ائله‌ماق سيزه يوخاري انگيزه وئرر و تمبل‌ليقدان اوزاق ساخلار.
* گون بويو كيفايت قدر سو ايچين تا بدنيز
سوسوز اولماسين.
* گئجه‌لر كيفايت قدر ياتين تا سحرلر
داها راحات دوراسيز.
* قند و فروكتوزو يوخاري اولان يئمكلري
يئمه‌يين، چونكي بو يئمكلر باعيث اولار بدنيز ياغ يئرينه قند يانديرسين. هابئله
شيرني و شوكولات كيمي ساده قندلر قيسسا مودّتده سيزين انرژيزي چوخالدار، آما سونرا
قانيزين قندي آزالار و تازادان يورولوب آجالارسيز.
* چاليشين ايمكان داخيلينده آز
تيلويزيونا باخاسيز.
* گونده‌ليق ايشلر و برنامه‌لريزدن بير
كوپي ائوين هر يئرينده ساخلايين: بيرين يخچل اوستونده، بيريني كامپيوتر ميزينده،
بيرين آينا قاباغيندا و حتي بيريني يوخو اوتاغيندا.