موحقيقلر بير آلت
تاپيبلار كي 43 مين ايل قيدمت‌اينن دونيانين لاب قديم موسيقي آلتي تانينير.
مهر خبرگوزاريسي‌نين
گوزاريشينه گؤره، قوش سوموگو و فيل ديشندن دوزلميش بو فلوتلار آلمانين جنوبوندا
بير كؤهولدن تاپيليبلار. همن كؤهول كي اوروپانين حرفه و صنعتينه گؤره بيرينجي
نيشانه‌لري اؤزونده ساخلايير.
دانيشمندلر كربون طريقي
اينن عؤمرو موشخص ائله‌ماق يولو اينن بيليبلر كي بو فلوتلارين 42-43 مين ايل
قيدمتلري وار.
«تام هايام» باشليغي‌اينن «آكسفورد» دانيشگاهيندان بير
تحقيق گروهي بيليبلر كي فلوت تاپيلان لايه‌ده‌كي حيوان سوموكلري‌نين تاريخي
فلوتلارينان بيردير.
«توبينگن» دانيشگاهيندان اولان «نيك كونارد» كي قازينتي
زاماني و آلمان فلوتلاري‌نين تاپيلان زاماني حاضيريدي، دئدي: بو نتيجه‌لر بيزيم
نئچه ايل قاباق مطرح ائله‌ديغيميز فرضيه‌ني مؤحكمله‌دير. بيز اينانيريق كي دانوب
چايي 40-45 مين ايل قاباق اوروپا مركزينده اينساني حركتلر و تكنولوژي يئنيليقلار
اوچون موهوم بير مقصددير.
«گایسن کلوسترله» كؤهولو منطقه‌ده‌كي نئچه كؤهولون بيريدير
كي اينديه‌جن اوندان اينساني بزك اشيالاري، رمزلي تصويري و تمثيلي هونرلر و موسيقي
آلتلري تاپيليب.
ايش‌بيلنلر اينانيرلار كي بو موسيقي آلتلري ديني مراسيملرده
چالينارميش.
موحقيقلرين بير عيدّه‌سي بئله ايستيدلال ائديرلر كي موسيقي
اينسانلارين او جمعي رفتارلارينداندير كي اونلارا كؤمك ائديب كؤهولده ياشاماقدان
قورتولالار، بير ياشاييش كي 30 مين ايل قاباق اوروپانين چوخ قيسمتلرينده آرادان
گئديب.
موحقيقلر بوندان قاباق موفّق اولموشدولار 35 مين ايل قاباغا
مربوط اولان بير قديمي فلوتون بوتون اجزاسيني، آلمانين جنوب غربينده "هول
فلس" كؤهولوندن تاپسينلار، كي تاپيلاندان سونرا اونو لاب قديمي موسيقي آلتي
بيلديرديلر.
هابئله اوندان قاباق بير آيري فلوت تاپميشديلار كي اونون
قيدمتي 34 مين ايل‌ايدي. آلمانلي باستان‌شيناسلاري دئديگينه گؤره، بو تازا فلوتون
تاپيلماسي‌نين چوخ اهميّتي وار مخصوصاً دوزلديغي مادّه‌يه گؤره، چونكي اونون
دوزلتماغيندا بوروشوق تكنولوژي ايشله‌نيب و مهارتلي اله احتياجي واريدي.
موحقيقلر دئييرلر كي «گایسن کلوسترله» كؤهولندن تاپيلان بو
نمونه‌لرين تاريخي گؤرسه‌دير كي مودئرن اينسانلار بوزلاق دؤوروندن قاباق تقريباً
39-40 مين ايل قاباق دانوب چايي‌نين شومال بؤلومونه واريد اولوبلار.