سلامت نيوز: تاجيكستان جماعتي‌نين غذا يئماقلاري‌نين گؤزل عادتي بودور كي اونلار چوخ مونظم غذا يئيرلر و يئماق ساعتينه چوخ اهميت وئررلر. بدنيميزين بيولوژيك ساعتي وار . . .

ساده سؤزله، يئماق و ياتيب آييلماقدان توتدو بوتون گونده‌ليق ايشلريميز اوچون بدنيميزده مخصوص نظم وار. هامي‌نين بدنينده غذانين هضم و جذبي اوچون ترشّوح تاپانُ هورمونلارا مخصوص ساعت وار يعني هر نه‌قدر داها مونظم غذا يئساق، بير او قدر بدنين بيولوژيك ساعتي‌نين نظمينه كؤمك ائتميش اولموشوق. و بدن‌‌ده غذانين هضمي و جذبي اوچون لازيم اولان حاضيرليغي اولار. و غذانين يئماغي و هضم و جذبي دوزگون انجام تاپسا، يئماقدان سونرا آغيرليق و دولولوق احساسي بيزه ال وئرمز.

تاجيكستان جماعتي‌نين بير آيري گؤزل عادتلري‌ده بودور كي غذا وعده‌لرين هئچ بيرين حذف ائله‌مزلر. بيز ساليم يئماق برنامه‌سينده اوچ اصلي وعده و ايكي ايلا اوچ ميان وعده يئماغي تأكيد ائديريك. تاجيكستانليلار هئچ وعده‌لريني حذف ائله‌ميه‌نده، يعني بو دوزگون يئماق برنامه‌سينه عمل ائديرلر. ياخجيدير بيله‌سيز كي بيز يئماق وعده‌سيني حذف ائدنده بدنيين يئماغا احتياجي آرادان گئتمير بلكه بدن اؤز احتياجيني آيري يئردن تأمين ائدير و سلول‌لارين ايختياريندا قويور. مثلاً بدنيميزين هميشه قنده احتياجي وار. ايندي بدنين، قند احتياجي موختليف غذالارين يئماغي‌اينن تأمين اولماسا، بدن بو احتياجي عَضوله‌لردن تأمين ائدر و لازيم اولان قندي قارا جيگره چاتديرار. بو منبعلردن ايستيفاده ائله‌ديقجن، بدنين متابوليسمي گئد-گئده آزالار و بئله‌ليكله كؤكلوغا زمينه فراهم اولار.

اوچونجو نوكته تاجيكلرين يئماق يئيه‌نده دانيشماماقلاريدير كي بو دا اونلارين گؤزل عادتلريندن ساييلير. بيز غذا يئيه‌نده فيكريميزي كيتاب اوخوماغا، تيلويزيونا باخماغا يا دانيشماغا وئرساق، حتماً توخلوق سيگنال‌لاريني وقتينده آلانمايا‌جاغيق و توخلوغوموزدان خبريميز اولماياجاق. بئله اولاندا چوخ يئماق و بير زماندان سونرا كؤكَلماق بعيد اولماياجاق. بوندان علاوه اولا بيلر كي يئماق زماني دانيشيقلاريميزين بير پاراسي خوشوموزا گلمه‌سين و بو باعيث اولا غذانين هضم و جذبينه لازيم اولان هورمونلارين ترشّوح تاپماسيندا خيلل يارانا و بو مسأله بدنيميزين ساغلامليغينا قولاي اثر قويا.