سیدالشهدا(ع)
سؤزو گون سؤزودور/حسيني نهضت گرك حيفظ اولا
ايمام
خميني(ع) اينقيلابين پيروزلوغونا راسيخ ايماني واريدي و اينانيردي كي ايمام
حسينين(ع) قياميندان اولگو گؤتورماغينان و محروملار و موستضعفلرين ايمان و ايخلاص
گوجونه دايانماغينان دونيا ايستيكباري و اونون موزدورلاري‌نين ساواشينا گئتمك
اولار.
فارس
خبرگوازاريسي‌نين گوزاريشينه گؤره، جوأرتينن دئمك اولار كي ايسلامي اينقيلابيندان
ايللر قاباق و اوندا كي بيگانه‌لرين سولطه‌سي و ديكتاتورلارين ايختيناقي يأس و
اومودسوزلوقدان قالين بير توز هر يئري بوروموشدو، ايمام خميني(ره) اينقيلابين
پيروزلوغونا راسيخ ايماني واريدي و اينانيردي كي ايمام حسينين(ع) قياميندان اولگو
گؤتورماغينان و محروملار و موستضعفلرين ايمان و ايخلاص گوجونه دايانماغينان دونيا
ايستيكباري و اونون موزدورلاري‌نين ساواشينا گئتمك اولار. او زمانلار ايران جماعتي
ايكي آجي تجروبه‌اينن اوز به اوز اولدولار. مشروطيت تجروبه‌سي كي خاريجي قودرتلره
باغلي اولان روشنفيكرلرين الي‌اينن اينحيرافا چكيلدي و نفت صنعتي‌نين ميلّي اولماق
نهضتي كي مصدق روحانيتي قيراغا قويماغينان و ايسلامي ارزيشلردن اوزاقلاشماغينان،
اونو مردادين 28 كودتاسي و پهلوي‌نين قاييتماغينا چكميشدي. بو اوزدن اينقيلابين
باشلانيشيندا بير عيدّه نوخبه‌لرين ايچينده ايكي اوركلي‌ليق واريدي. ميثال اوچون
حسنين هيكل پاريسده ايمامينان گؤروشنده اونلاردان سوروشور، ايسلامي حركتي،
پيغمبرين زماني‌اينن موقاييسه‌ده نئجه گؤرورسوز؟ و ايمام جواب وئرير: ايرانين
ايندي كي حركتي ايسلام صدري حركتي‌نين بير نمونه‌سيدير كي قيسا زماندا چوخ درين و
اوزون تأثير قوياجاق.
حسنين
هيكل قاباقجادان شاهيد اولدوغو واقعيتلره ديقّت ائله‌ماغينان ايسلامي اينقيلابين
گئنيشلنماغيندان سوروشور. جماعتده اومودسوزلوق و يأس روحيه‌سي اولا-اولا بو حركتين
گئنيشلنماغي هاردان ريشه آلير؟ حضرت ايمام اونون سوآلي‌نين جوابيندا آيدين
گؤروشونن ايرانداكي ايسلامي اينقيلابين آينده‌سين بلكه موسلمانلارين آينده‌سين (كي
بويون 33 ايلدن سونرا گؤروروك) بئله ترسيم ائله‌دي: «بو يأس بوتون ايسلامي اؤلكه‌لرده
واريدي. بونا گؤره كي غربي و اجنبي تبليغاتي او قدر قودرتلي‌ايدي كي ايسلامي اؤلكه‌نين
بوتون جماعتيني اؤز سولطه‌سينه آلميشدي و بو جهتدن جماعتدا قورتولوشا اصلاً اومود
يوخيدي. ايندي بو حركت و نهضتين تاپيلماغي‌اينن احتيمالي وار آيري اؤلكه‌لرده بونا
قوشولسونلار. نه تكجه احتيمال بلكه يقينه ياخين كي موسلمانلار بو سولطه‌دن
قورتولالار، و آللاهدان موسلمانلارين قورتولوشون و آرزيلارينا چاتمالاريني
ايستيرم.
حسنين
هيكل 28 مرداد كودتاسينا ايشاره ائله‌ماغينان و شاهين دونيا ايستيكباري و
ابرقودرتلر و . . . وابسته اولماغينا ايشاره ائله‌ماغينان، ايسلامي اينقيلابا اورك
باغلي‌ليغين احساسي و اونون موفقيّتيني آرزولاماغينان اؤز دغدغه‌لريني بئله دئدي:
« . . . نئچه ايل قاباق من ايراندا شاهينان گؤروشدوم. هامي بئله تصوور ائديردي كي
اوضاع تثبيت اولوب. سوآل بودور كي نيه بو وضع اوز وئردي؟ نئجه اوز وئردي؟ و نهضتين
بو عظيم گئنيشلنمه‌سي هاردان ريشه آلدي؟ حضرت ايمام اونون جوابيندا نهضتين 1332ده
كي شيكستي‌نين و ايسلامي اينقيلابين پيروزلوغونون عيلّتلرين بئله سايديلار:
«بو
قودرت ايسلامدان ريشه آلير. كاشاني-مصدق زمانيندا سياست اصل‌ايدي. نهضتين سياسي
جنبه‌لري قوي‌ايدي. كاشاني زمانيندا اونا هم يازديم و هم دئديم كي گرك ديني جنبه‌لره
اهميّت وئره‌سيز. ائليه‌بيلمه‌ديلر يا ايسته‌مه‌ديلر، اونلار ديني جنبه‌لرين
تقويتي عوضينه و بونون يئرينه كي ديني جهتلري سياسي جهتلره غلبه وئرسينلر، اؤزلري
سياسي اولدولار، مجليس رييسي اولدولار كي بو ايشتيباهيدي. من دئديم گرك دين اوچون
ايشله‌سينلر نه اينكي سياسي اولسونلار. آما ايندي نهضت بوتون جهتلرده ديني و
ايسلاميدير، سياست‌ده اونون ايچينده‌دير، ايسلام سياسي ديندير، سياست بو نهضتين
ايچينده‌دير. ياخجيدي ايندي‌ده ايرانا باش ووراسيز و گؤره‌سيز كي بويون نه‌دير و
او گون نه‌ايدي ...»(1)
حضرت
ايمام نهضتين باشلانيشيندان 1342-نين خردادين 15-ندن قاباق كربلا قيامي و حسيني
عاشوراني موباريزه‌نين تكجه يولو بيليردي و بويوروردي:
«
. . . حضرت سيد الشهدا اؤز ايشي‌اينن بيزه اؤيرتدي كي مئيداندا وضع نئجه گرك اولا
و مئيدانين ائشيگينده وضع نئجه اولماليدير. موباريزه اهلي اولانلار نئجه گرك
موباريزه ائده‌لر. جيبهه داليسيندا اولانلار نئجه گرك تبليغ ائده‌لر. موباريزه‌نين
نئجه‌ليغي، و بوكي آز جماعتينن چوخ جماعتين آراسيندا نئجه موباريزه اولماليدير. هر
يئري الينه كئچيتميش بير قولدور حكومتين قاباغيندا قيامين نئجه‌ليغي، بير آز عيدّه‌اينن
نئجه اولماليدير. بونلار بير زادلاردير كي حضرت سيد الشهدا جماعته اؤيرديب و اونون
بوزوگوار اهل بيتي و عاليقدر ائولادي هامي‌يا اؤيرتدي كي موصيبت واريد اولاندان
سونرا نه ائتمك لازيمدير. گرك تسليم اولماق؟ گرك موجاهيده‌ده تخفيف وئرمك؟ يا گرك
حضرت زينب- سلام الله علیها- كيمي كي تصغر عنده المصائب (موصيبتلر اونون
يانيندا كيچيلر) دايانماق و كوفر و زندقه موقابيلينده دانيشماق و يئري گلنده سؤزو
دئمك و حضرت علی بن الحسین-سلام الله علیه- كيمي كي او ناخوشلوغو اينن، شايسته
اولان كيمي تبليغ ائله‌دي . . .» (2)
«
. . . من پاريسده اولاندا بعضي خيرخواهلار دئييرديلر داها اولماز ! اولماياندا نه
ائتمك لازيم؟ گرك بير آز [...] دئديم بيزيم شرعي تكليفيميز وار، عمل ائده‌ريك و
بونون قئيدينده قالماريق كي ايش قاباغا گئدسين.چونكي بيز اونو بيلميريك، ايندي‌ده
قودرتيميز يوخدور آما تكليفيميز وار. بيز اؤز شرعي تكليفيميزه عمل ائده‌ريك. من
بئله تشخيص وئرديم كي گرك بو ايشي گؤرك، اگر قاباغا آپارديق، هم تكليفه عمل ائله‌ميشيك
و هم چاتميشيق مقصده، اگر قاباغا آپارانماديق، شرعي تكليفه عمل ائله‌ميشيك،
گوجوموز چاتماييب، حضرت امير ده ائليه‌بيلمه‌دي، بو كي بير شئي دئييل. ياخجي، بيز
گوجوموز قدر ايش گؤره بيله‌ريك . . . » (3)
ايمان
و عاريفانه عشق‌اينن اعلام ائليرلر كي موباريزه يولو، شهيدلر سالاري، انبياء
يولونون واريثي، تاريخده و هر زماندا، گون سؤزودور.
«...
ايندي بيز گرك گون سؤزو دانيشاق، سيدالشهدا سؤزو گون سؤزودور، هميشه گون سؤزودور،
هميشه گون سؤزون سيدالشهدا گتيريب و اليميزه وئريب . . .بو نهضتي قاباغا آپاران
ائله بونلاردير، سيدالشهدا اولماسايدي بو نهضت‌ده قاباغا گئتمزدي. سيدالشهدا هر
يئرده وار: کل ارض کربلا. هر يئر سيدالشهدانين محضريدير . ..» (4)
«گرك گؤرك بو مذهبين و ايسلامي اؤلكه‌لرين، شيعه اؤلكه‌لرين
بقا رمزي نه‌دير. بيز گرك او رمزي ساخلاياق. رمزلرين باشيندا اولان سيدالشهدانين
قضيه‌سيدير. سیدالشهدا-
سلام الله علیه- مذهبي بيمه ائله‌دي، اؤز عملي‌اينن ايسلامي بيمه ائله‌دي،
ساخلادي. او بوزورگوارين ائله‌ديغي نهضت و وئرديغي شيكست- هرچند كي اؤزو اؤلدو.
لاكين شيكست وئردي- اُموي‌لره و آيريلارينا، او نهضت گرك ساخلانا. بيز اگر ايسته‌ساق
كي اؤلكه‌ميز موستقيل اولسون، بير آزاد اؤلكه اولسون، گرك بو رمز ساخلانسين . . .»
(5)
«
. . .گرك بو مطلب آخيره‌جن اولا و اوندا سوستلوق اولمايا، تا او گونه‌جن كي
بايراغي بايراق صاحيبينه وئره‌لر. . .» (6)
ـــــــــــــــــــــــــــــــــــــــــــــــــ
1)
ايمام صحیفه‌سي ج5 ص 267 و 268
2)
ايمام صحیفه‌سي ج17 ص 57
3)
ايمام صحیفه‌سي ج8 ص10
4)
ايمام صحیفه‌سي ج8 ص526
5)
ايمام صحیفه‌سي ج11 ص97
6)
ايمام صحیفه‌سي ج21ص4