سلامت نيوز: اوشاغين پيس تغذيه‌سي حتّي اگر غير جيسمي دليل‌لري‌ده اولسا اوزون مودّتده اوشاقلارين روشدونو موختل ائلر و بئله اولسا گرك اوشاق موتخصّيصينه موراجيعه اولا.

اوشاقلارين علمي تغذيه انجومني دئدي: مايعاتين حديندن آرتيق ايچيلمه‌سي مخصوصاً موركبّاتدان دوزلميش مايعات، اوشاقلاردا ايشتاهاني آزالدار و اصلي و جاميد غذاني يئماغا مئيل‌لرين آزالدار.

بو گوزاريشه گؤره، زيندگانليغين ايكينجي ايلينده، ياري جاميد غذالارين چوخ مصرف ائله‌ماغي اوشاقلاردا پيس تغذيه‌نين يارانماسينا سبب اولور چونكي بوجور اولاندا احتيمالي وار اوشاقلار جاميد و برك غذالاري يئمه‌سينلر.

بو گوزاريش آرتيرير: آز ياشلي اوشاقلارين بعضيسي غذالاريندا چوخ خاصاباز اولورلار و ايمكاني وار غذالارين فقط خاص نوعلارين مصرف ائليه‌لر و آتا آنايا دا راحات اولور كي اوشاغا سئوديغي غذاني وئرسينلر و بو باعيث اولار اوشاقلارين تغذيه‌سي پيس اولسون. شايد اوشاقلار دولو بوشقاب گؤرنده سرخورده اولالار بونا گؤره ياخجيدي اونلارين غذالاري چوخ وعده‌لرده، آز-آز  و رنگارنگ و گؤزل اولا.

بو گوزاريش دئيير: آتا آنا ايضطيرابي‌نين اوشاقلارين پيس تغذيه‌سينده موهوم رولو وار. اونلار اوشاقلارين نه يئيب يئمه‌ديقلاري باره‌ده چوخ حساسديلار و اوشاقلارين يئماغي گركديغي غذالار باره‌سينده غير واقعي تصوورلري وار. اوشاقلار بير غذاني يئماقدان چكيننده آتا آنانين رفتاريندا اثر قويور و او غذاني يئماغا اوشاغا فيشار گتيريرلر.