ايضطيراب و افسورده‌ليق ايكي رواني وضعيّتديلر كي بيزيم،
دؤره‌بر دونياميزا نئجه باخماميزا اثر قويورلار.
گرچي گاهدان بو حالتلر اينسانين ياشاييشيندا عادي و طبيعي‌ديلر
آما اگر ايدامه تاپا و داييمي اولا، اينساندان ياشاماق لذّتيني آلار.
افسورده‌ليق سلامتليق ، رابيطه و مالي مساييلده شيكست
يئماغين اصلي نتيجه‌سيدير. آمار نيشان وئرير كي دونيادا 120 ميليون نفر افسورده‌ليغا
موبتلاديلار.
افسورده‌ليغين درماني اوچون جماعت چوخراق شيميايي داوالارا
اوز گتيريرلر آما بو مقاله‌ده آمريكالي روانشيناسلار نئچه حياتي يول توصيه ائديرلر
كي بو ايختيلال‌لارينان طبيعي صورتده موقابيله اولسون.
كامن‌هلت سايتي‌نين گوزاريشينه گؤره، ايضطيراب و افسورده‌ليغين
قاباغيني آلماق اوچون بو يئددي ساده و طبيعي يولدان ايستيفاده ائله‌مك اولار.
1. حتماً گونده بير آز آزاد هاوا و طبيعي ايشيق معرضينده
اولون. مودرن ياشاييش اينساني آزاد هاوادا ايشله‌ماقدان محروم ائديب، آما سيز
گونده 20 دقيقه دودي عئينك‌سيز طبيعي ايشيق معرضينده اولسوز، روحيّه‌زده چوخ فرق
ائلر.
2. هر جهتدن موناسيب غذايي رژيميني سئچين. موطاليعه‌لر
نيشان وئرير كي افسورده‌لرين چوخو شيرني و قهوه كيمي ايچمه‌لي‌لردن ايستيفاده
ائليرلر. بونا خاطير ساليم تغذيه اوچون ايكي ساده سؤزه عمل ائله‌يين:
- سبوسلي غلات، ميوه، گؤي، باليق و تويوق مصرفيني چوخالدين.
- قهوه و الكول كيمي چوخ تحريك ائدن ايچمه‌لي‌لردن واز
كئچين.
3. موثبت دوشونن آداملارينان ايرتيباطيز اولسون. واقعده
موثبت روحيه‌لي آدامينان دانيشماق بو زمينه‌ده مؤثيردير آما اصلي و درين تأثير
اوندا اولار كي سيز شاد بير جمعده اولاسيز و خانيواده حيمايتيندن برخوردار اولاسيز
و اوز لذّتلريزده سهيم اولاسيز.
4. فعال اولون و گونده‌ليق ورزيش ائله‌يين. ياريم ساعت
مونظم بدني فعاليت، سيزه ايضطيراب و افسورده‌ليغا غلبه ائله‌ماقدا كؤمك ائلر.
5. اخلاقي
ياخجيلادان غذالاري، اؤز غذايي رژيميزه آرتيرين. بير غذايي وعده‌نين صيرفاً مرغوب
اولماسي بدنه لازيم اولان ريز موغذيلرين چاتماسي معناسيندا دئييل مگر بو كي بير
موناسيب اينتيخابينان، بدنيزين هورمونلاري‌نين تعادولونو دنگه‌يه سالاسيز. بونا
خاطير توصيه اولور D ويتاميني و
آشاغيداكي موكمّيل‌لري، غذايي رژيميزده يئرلشديرين:
- اومگا3 باليق
ياغي كي EPA و DHA واريدي، اخلاقين ياخجيلاشماغي، سروتونين
چوخالماسي، هورمونون دنگه‌سي و افسورده‌ليغين درمانينا كؤمك ائدر.
ب كومپلكس ويتاميني اعصابين سلامتليغينا ضروريدير آما بونو
دا بيلين كي الكول، كافئين، نيكوتين و فَراوَري اولموش و قندي غذالارين
مصرفي و استرس‌اينن، ب ويتامينلري تخريب اولار.
- C ويتاميني
بیوفلاوونويیدلرينن بيرليقدا -كي اونون ميقداري افسورده‌لرين بدنينيده 30 درصد آز
اولور- مصرف اوله‌يين. اوندان علاوه استرس، سيگار، آسپرين، ضيد بارداري داوالار و
چوخلو آيري داوالار بيزيم ويتامين C احتياجيميزي
چوخالدار.
- مولتي ويتامين و كلسيوم، روي و منيزيوم كيمي موختليف
املاح اخلاقين ثابيتلشمه‌سينه كؤمك ائلر و اونلارين آزليغي افسوره‌ليغا باعيث
اولار.
- كيفايت قدر يوخو و ايستيراحتيز اولسون. كافئين كيمي
موحرّيكلر سيزين ياخجي يوخوزو اليزدن آلار. بوندان علاوه توصيه ائديريك ياخجي يوخو
اوچون يوخو بهداشتيني رعايت ائدين.
6. موثبت موضوعلارين اوستونده موتمركيز اولماغي اؤيره‌نين.
بونون تمرينه، ايستيمرارا و موداويمته احتياجي وار آما اگر بير عادته تبديل اولسا،
زيندگانليغيزي هميشه‌ليق گؤزل‌لشديرر.