بو ايكي دوعا و موناجاتدا، آللاها
ايستيغفار و اينابه و ايستيغاثه‌ني عاشيقانه صورتده گؤرورسوز چونكي بنده و معبود
آراسينداكي عشق و محبت رابيطه‌سيني ترسيم ائدير و بو همان زاد ايدي كي بوزورگوار
ايمام(ره) اورك و روحونو اونون وسيله‌سي‌اينن ايشيقلانديريردي.
ايمامين(ره) «كميل» دوعاسي و «شعبانيه»
موناجاتينا اولان علاقه‌سي
آشاغيدا گلن يازي آيت‌الله خامنه‌اي‌نين
ايمامدان اولان بير خاطيره‌سيدير كي اينقيلاب رهبري‌نين حفظ و نشر آثار سايتي
شعبان آيي موناسيبتينه مونتشير ائدير:
بير دفعه اونلاردان(ايمام خميني)
سوروشدوم معروف دوعالاردان هانسينا خاص علاقه يا اعتيقاديز وار؟ اونلار بير آز
تأمّولدن سونرا بويوردولار: «كميل» دوعاسي و «شعبانيه» موناجاتي
بوننان بئله‌كي آيري دوعالار دا -ابوحمزه‌ثمالي
و يا عرفه گونو ايمام حسين دوعاسي و چوخلو آيري دوعالار- آللاهينان ايرتيباط
قورماقدير؛ آما بو ايكي دوعا و موناجاتدا ايستيغفار، اينابه و ايستيغاثه حالتيني
عاشيقانه صورتده گؤرورسوز. «كميل» دوعاسي هم موتعال آللاهينان موناجاتدي و هم بنده
و معبود آراسينداكي عشق و محبت رابيطه‌سيني ترسيم ائدير و بو همان زاد ايدي كي
بوزورگوار ايمام(ره) اورك و روحونو اونون وسيله‌سي‌اينن ايشيقلانديريردي.
ايمام حسين(ع) ميلادي و پاسدار گونو،
پاسدارلارين گؤروشونده‌كي سوخنراليقدا 68/12/10
«شعبانيه» موناجاتي باره‌ده آيت‌الله
خامنه‌اي‌نين يادداشتي
1369/10/1
بسم‌الله الرحمن‌الرحيم
دوعا مؤمونون وسيله‌سي و موضطرين ملجأي و
جاهيل و ضعبف اينسانين علم و قودرتين فياض منبعي‌اينن رابيطه‌سيدير، و بشر
آللاهينان روحي ايرتيباطسيز و غني‌بالذاتا نيازين دئمه‌ميش، زيندگانليق عرصه‌سينده
آوارا و
درمانده و هدره گئتميش ساييلير؛
"قل ما يعبؤا بكم ربىّ لولا دعاؤكم "1.
لاب ياخجي دوعا اودور كي آللاها عاشيقانه
معريفت و اينسانين نيازلارينا عاريفانه بصيرتينن يازيلا و بونو تكجه آللاهين
پئيغمبري (ص) و اونون اهل بئيتينده تاپماق اولار. آللاها حمد اولسون كي اهل
بئيتدن(ع) بيزيم قورتولماز ذخيره‌ميز وار كي اونلار اونس تاپماق، صفا،
معريفت، كمال و محبت باغيشلير و بشري گوناهلاردان تميزله‌يير.
شعبان آيي‌نين مأثوره موناجاتي – كي
ريوايت اولوب اهل بئيتين(ع) اوندا موداويمتلري واريدي- او دوعالارداندير كي اونون
شيوا ديلي و عاريفانه لحني، عالي معاريفدن دولو اولان چوخ والا مضمونلاري‌اينن بير
يئرده‌دي و اونون تايين معمولي و موحاويره ديللرده تاپماق اولماز و اساساً او ديل‌اينن
دئمك اولماز. بو موناجات، لاب سئچيلميش صالح بنده‌لرين آللاهينان ايستيغاثه‌لري‌نين
وصف حالي‌نين كاميل نومونه‌سيدير. هم معاريف درسيدير، هم مؤمون اينسانين
آللاهدان ايسته‌مه‌سينه و عرض حالينا اولگودور.
ايمام زين‌العابدين حضرت على‌بن‌الحسين
(ع) دان نقل اولان 15 موناجات، بوندان علاوه كي اهل بئيتدن(ع) مأثوره اولان
دوعانين باريز خوصوصيتيدير، بو مزيّتي وار كي مؤمونون موختليف حالتلرينه گؤره
موناجاتلاري اينشا ائديبدير.
آللاه بو موبارك كلمه‌لرين بركتينه هامي‌يا
ايستيفاضه و خودسازليق توفيقي عينايت بويورسون.
آمين.
1.
قُلْ مَا يَعْبَؤُاْ بِكُمْ رَبِّي
لَوْلا دُعَآؤُكُمْ فَقَدْ كَذَّبْتُمْ فَسَوْفَ يَكُونُ لِزَاماً. دئنه: اگر
سيزين دوعاز اولماسا، آللاهيم سيزه ارزيش قاييل اولماز (چون ياخجي سابيقه‌ز
يوخدور.). سيز حقي تكذيب ائله‌ميسيز و تئزليكله تكذيبيزين كئيفري اتگيزي توتاجاق.
2.
موباركه فرقان سوره‌سي آيه 77