بئله فرض ائله‌يين كي سيزين يولداشيز
سقفدن آسيلان چيراغي دگيشمك اوچون نرديوانا چيخيب و يئننده نرديوانين بير پيلّه‌سي
سينيب و او يئره ييخيلير. اونون قولو چوخ اينجير و سيزي نيگران ائلير.
قولونا باخيرسيز و احتيمال وئريرسيز كي
سينيب. آما بيلميسيز كي سينماغين علامتلري نمنه‌دير كي سيزين شكّيز يقينه تبديل
اولسون. بو زمان نه ائله‌سيز؟
معمولاً غير موتخصّيص آداملار سينيغي
چتين تشخيص وئررلر، آما شك ائليه‌ن زمان فرضي سينماغا قويون.
سوموكلرين بيرليگي آرادان گئدسه سينماق
يا چاتلاماق اوز وئرر. سينماق ايكي يئره بولونور: آچيق و باغلي. آچيق
سينماقدا سينان سوموك دريني كسر يا پارچالار، آما باغلي سينماقدا دري ساليم اولار
و يارالانماز. معمولاً آچيق سينماق، قان گئدماغا و چيركلنمگه خاطير نيسبت باغلي
سينماقلاردان خطرلي‌راقديلار. واقعده اصلي موشكول سينيغين اؤزو دئييل بلكه سينان
سوموگون ياخيندا اولان حياتي اورگانلارا صدمه وورماسيدير.
سينيغين علامتلري نه‌دير؟
1. شيشمك: بو علامت سينماقدان بيلافاصيله
سونرا گؤروشر. معمولاً سينيق سوموگون ايتي قيراقلاري، صدمه گؤرن يئرين ياخينيندا
اولان دامارلاري و آيري اورگانلاري كسر و قان آخما و ايلتيهابا باعيث اولار.
2. شكلي دگيشمه‌ك: معمولاً سينماق
اثرينده سوموكده شكلي دگيشمك، قيسالماق يا زاويه‌لي اولماق كيمي علامتلر گؤروشر.
البته چاتلاماقدا بو علامتلر گؤروشمز. بو علامتي تشخيص وئرمك اوچون صدمه گؤرن عضوي
آيري طرفين ساليم عضوي‌اينن موقاييسه ائدين.
3. ال ووراندا اينجيمك: بو، سينماغين
موطميين علامتلريندندير. معمولاً اينجيمك فقط صدمه گؤرن يئرده اولار و مصدوم
اينجيه‌ن يئري بارماغي‌اينن گؤرسه‌ده بيلر. سينيغين يئرين تاپماق اوچون پالتاري
قيراغا چكين و ياواش ياواش سوموگون بويونجن بارماغيزي وورون. اينجي‌ن نوقطه سينان
يئر اولا بيلر.
4. صدمه گؤرن عضووين ايشدن توشمه‌سي:
سينان عضو ترپشسه اينجييَر. آغرينين چوخلوغونا خاطير مصدوم او عضوي ترپه‌ده بيلمز.
البته توجه ائدين كي احتيمالي وار مصدوم آغريني تحمّول ائده و عضوي ترپه‌ده.
5. سوموگون سورتوشمه احساسي: گاهدان
سوموك سيناندا مصدوم سينماق سسين ائشيدر و يا عضوي ترپه‌دنده سوموكلرين بير بيرينه
سورتوشمه سسين ائشيدر. بو موطمييناً سينماق علامتيدير.
6. سوموگون فاصيله آچان يئرين لمسي: اگر
بو فاصيله، لمس ائله‌ينده بيلينسه حتماً سينماق علامتيدير.
7. صدمه گؤرن يئرين رنگ دگيشمه‌سي:
معمولاً سينماغين لاب گئج و آخيرينجي علامتي، سينان يئرين رنگ دگيشمه‌سي و گؤوَرمه‌سي
يادا رنگي‌نين آتماسيدير كي معمولاً حاديثه‌دن بير ساعت سونرا گؤروشر.