ویتامینلر و معدنی ماده‌لرین هضم آچاری، سملرین دفعی، بدن ارگانلاریندان محافظت و بدن حرارتی‌نین تنظیمی و دئماق اولار بدنین بوتون ایشلرینده مهم رول اوینایان، سودور.
هر گون لازم مقداردا سو ایچدیگیزه مطمئن اولمالیسیز. خانیملارا گونده 2 الی 3 لیتر و آغالارا گونده 3 الی 4 لیتر سو ایچماق لازمدیر. حتی سوسوزلوق حسی سیزده اولماسا اؤزوز سو ایچماغا ملزم ائله‌یین. بوندان علاوه سولو یئتیشمیش میوه‌لری سبزیجات یئماق، بدنین سویونو آرتیرار و بدنده ویتامینلر و املاحین جذبینه کؤمک ائلر.
بدنده سوسوزلوق علامتلرینی جدی سایین و 10 اخطارینان اوزلشدیغیز زمان فوراً سو ایچین:
آغیزدان ایی گلن زمان: آغیزین پیس اییلری‌نین بیر علتی، آغیز سویونون قوروماسیدیر. آغیز سویو آغیزی تمیزلر و باکتری‌لری آرادان آپارار و بدنین سوسوز قالدیغی زمان، آغیزداکی باکتریلرین سایی چوخالار و آغیز ایی‌لنر.
یئماق هَوسی: سوسوزلوق، بدنده گلیکوژن و آیری انرژی شکل‌لرین آزاد اولماسی‌نین قاباغینی آلار و بو دا سیزده یئماق هَوسینی مخصوصاً شیرین یئمه‌لیلره آرتیرار چونکی بدن اؤزو گلیکوژن دوزلده بیلمیر. شیرین یئمه‌لیلرین باشینا گئتمه‌میش بیر لیوان سو میل بویورون. حتی میوه و گؤی‌ده یئیه بیلرسیز.
آغری و التهاب: مفصل‌لرین غضروفلاری سویون واسطه‌سی اینن روان ایشله‌ییرلر. بدن سوسوزلایاندا غضروفلار اؤلوشگه‌ییر و بو دا حرکت زمانی سورتوشمه‌نین آرتیریر و مفصل‌لرده آغری‌یا سبب اولور. قهوه، غیر گیاهی چایلارین مصرفینی آزالدیب سویون مصرفینی آرتیرماق مفصل آغریلارینی آزالدار.
باش آغریسی: سوسوزلوق بئیینده سویون آزالماسینا سبب اولار. بو دا باشین جمجمه طرفیندن فشاردا اولماسینا و آغریماسینا سبب اولار. آیری طرفدن قانین آخیمی آزالار و بئینه لازم اولان اکسیژن چاتماماسی نتیجه‌سینده قان دامارلاری گئنیشلنر و باش آغریسی گلر. باشیز آغریدیغی زمانلار چای و یا آیری ایچمه‌لی یئره سو ایچمگه چالیشین.
اورگین غیر طبیعی ریتمی: سوسوزلوق، اورک ریتمی‌نین مسئولو اولان معدنی املاحی آزالدار. پتاسیم و منیزیم‌ون آزالماسی اورگین غیر طبیعی ریتمینن چالماسینا باعث اولار.
هضم سیستمی‌نین ضعیفلیگی و یبوست: سوسوزلوق مزمن یبوستین شایع علتلریندندیر. بدنین سوسوزلوغو یوغون باغیرساغین زاید ماده‌لرین دفعینه مانع اولار. سو غذانین تجزیه‌سینه کؤمک ائلر و فایدالی ماده‌لرین جذبینی یاخجیلاشدیرار. کفایت قدر سو ایچمه‌ماق هضم سیستمی‌نین ضعیفنمه‌سینه سبب اولار.
قورو دری و دوداقلار: بدن سوسوز اولدوغوندا بدن اولویت اساسیندا سو مصرف ائلر و الده اولان سویو لاپ مهم یئرلره مثلاً بئینه یوللار. سوسوزلوغون بیرینجی قربانی دریدیر. بدنین سوسوزلوغو تأثیرینده انعطافینی الدن وئرن دری، قیریشلانار.
بئینین سرعتی‌نین آزالماسی: دقتین آزالماسی، حافظه مشکلی، بئینین یورولماسی، باش آغریسی، غضب، افسرده‌لیق و یوخو مشکل‌لری بدنین سوسوزلوق علامتلریندن ساییلیر. بئنین دوز ایشله‌مه‌سی اوچون یوزده 85-نی سو تشکیل وئرمه‌لیدیر. بئینین بوتون ایشلرینه لازم اولان الکتریکی انرژیسینی سو وئرر. خفیف سوسوزلوق بوتون یاشلاردا بئینین سرعتی‌نین آزالماسینا سبب اولار.
سودویون تیره‌لیغی: تیره سودوکده چوخلو مقداردا سم وار و سیزه فوراً سو ایچاغیز اوچون اورژانسی هشداردیر. سوسوزلوق بؤیرک داشی یارادا بیلر.
یورقونلوق: بدنین سوسوز زمانی قانین حجمی آزالیب فشاریز چوخالار و اورگیزین داها آرتیق فعالیته احتیاجی اولار و نتیجه‌ده سیزه یوخوسوزلوق حسی ال وئرر. بدنه سو چاتدیرماق دوشوندوغوزدان چوخ داها مهم بیر شئیدیر. سویو میزیزه یاخین قویون. بئله‌لیغینان سو ایچمه‌لی اولدوغوز داها راحت یادیزا دوشر.
گونده‌لیق ایش بویو سو ایچین. مهم بیر قانونو رعایت ائله‌ماق لازمدیر. هر 15 دقیقه‌دن 170 میی لیتر سو ایچمه‌لیسز.