محقق‌لرین دئدیغینا گؤره، قانین DNA سیندا تازا آزمایش اینن سینوسلاردا اولان نادر آما اؤلومجول سرطانی تشخیص وئرماق ولار.
مهرین وئردیغی خبره گؤره، بالینی آزمایشلرین نتیجه‌سینده، بو قان آزمایشی یوزده 97 موردده نازوفارنکس سرطانینی دوز تشخیص وئریب. محقق‌لر بو آزمایشده قانین DNA-سیندا Epstein-Barr ویروسونون اولوب اولماماسینی تحقیق ائله‌ییرلر.
آمریکانین سرطان انجمنی‌نین اعلامینا گؤره، نازوفارنکس بورونون دالیسیندا بوغازین یوخاری قسمتی، آغیزین یوموشاق سقفی‌نین اوست قسمتی و بورون مجرالاری‌نین دالیسینا یئرلشیر و بورون و بوغاز آراسیندا هاوا یولو کیمی ایشله‌ییر.
بو انجمنین دئدیغینا گؤره بو شرطان نسبتاً نادردیر و هر 100 مین نفردن بیر نفرین مبتلا اولماق احتمالی وار.
بو ناخوشلوق داها چوخ چینین جنوبوندا و آسیانین آیری قسمتلرینده و آفریقانین شمالیندا شایعدیر و اونو واختیندا تشخیص وئرماق درمانیندا اساسلی رول اویناییر.
چین دانشگاهی‌نین تحقیق تیمی‌نین باشچیسی دنیس لو، بو باره‌ده دئییر: نازوفارنکس سرطانین Epstein-Barr ویروسی اینن مستقیم رابطه‌سی وار. بو ویروس تبخال‌لار خانواده‌سی‌نین عضویدیر.
او آرتیردی Epstein-Barr ویروسونون ژنومو نازوفارنکس سرطان تومورلاری سلول‌لاری‌نین یوزه دوخسانیندا تاپیلیر. بونا گؤره بو ویروس بو سرطانین یارادان فاکتورلاریندان اولماسینا اینانیلیر.
ایندی بو قان آزمایشی، بو سرطانین تئز و راحت تشخیصینه امکان یارادیب.