همیشه سبزیلرین چیی یئییلمه‌سینه تأکید اولونور. بو مسأله سبزیلرین چوخوندا صادق اولا بیلر آما بعضیسینده اونلارین پیشمیش یئییلمه‌سی داها فایدالی اولور.
سبزیلرده یوخاری مقداردا آنتی اوکسیدان وار. آنتی اوکسیدانلار، بدنده‌کی آزاد رادیکال‌لاری آرادن آپاریب ناخوشلوقلارین چوخونون قاباغینی آلارلار. بونا گؤره سبزیلرین مصرفی اورک دامار و سرطان ریسکینی آزالدار.
بامادور، یئرکؤکو و بروکلی کلمی پیشیریلمه‌سی اونلارین ارزشینی آرتیرار. یعنی بو سبزیلرده فیتوکمیکال ترکیبلری حرارت گؤرمه‌سه‌لر سلول جداریندا حبس قالارلار.
بامادور
بامادور علمی لحاظدان میوه‌لر سیراسیندا یئر آلیر. آما پیشیریلدیگی زمان سبزی ساییلیر. بامادور چوخ فایدالی و ث ویتامینی و لیکوپی انین دولودور. لیکوپن اونون قیرمیزیلیغینا سبب اولان فیتوکمیکالدیر.
بامادورو سودا و یا بوخاردا پیشیرماق اوندا اولان لیکوپنین لاپ یاخشی فعال ائله‌ماق یولودور. لیکوپن سرطان ریسکینی آزالدار اورکین ساغلیغینی آرتیرار و نورولوژیکی عکس العمل‌لری گوجلندیرر.
بروکلی
بروکلی کلم‌لر عایله‌سیندن ساییلیر و اونون آنتی اوکسیدان خاصیتی یوخاریدیر. هابئله بروکلی لوتئین و توکوفرول ایله دولودور. بو ترکیبلر قان دامارلاری‌نین التهابینی آزالدیب سرطان ریسکینی آزالدیرلار.
بروکلینی پیشیرمک اوندا اولان کاروتنوئیدلری آزاد ائلر. بروکلی‌نین لاپ گؤزل پیشیرمه یولو اونو سودا و یا بوخاردا پیشیرمکدیر. بو ایش اینن کاروتنوئید، لوتئین و فیتوئن‌لرین خاصیتی گوجلنر. فیتوئن پروستات سرطانین احتمالینی آزالدار.
یاخشی اولار بروکلی آز مدت قاینار سویون ایچینده قالا و سونرا گؤتوروله.
یئرکؤکو
یئرکؤکو ویتامینلر، بتاکاروتن و چوخلو معدنی ماده‌لر ایله دولو سبزیدیر. یئرکؤکو ویتامین آ و بتاکاروتنین اوندا چوخ اولدوغونا گؤره، آنتی اوکسیدان خاصیتینه مالکدیر. آزمایشلر یئرکؤکونون سودا پیشیریلمه‌سیله کاروتنوئیدلرین یوزده 14 آرتیریلماسینا سبب اولدوغونو گؤرسدیر.
یئرکؤکونو آیری جور پیشیرماق اوندا اولان آنتی اوکسیدانلیق خاصیتینی آزادلیر. یئرکؤکونون پیشمه‌سینه لاپ مناسب حرارت 130 درجه 20 دقیقه‌ده‌دیر.