(UARS) ماهواره‌سي‌نين يئر جوّينه توشمه‌سيندن 12
ساعت گئچندن سونرا، ناسانين مقاملاري بو سازمانين مركزي ساختيمانيندا بير مطبوعاتي
كونفيرانسدا اعلام ائله‌ديلر كي بو ماهواره‌نين توشمه‌سي‌نين يئر و زمانيندان دقيق
خبريلري يوخدور!
« اسپیس‌فلایت‌ناو»-ين گوزاريشينه گؤره بو كونفيرانسدا،
آمريكانين ديفاع ويزارتي‌نين موشترك فضايي فعاليتلر مركزي‌نين گؤندرديگي نقشه‌دن
پرده گؤتورولدو كي بو ماهواره‌نين يئرين باشينا دولانما مداريني نيشان وئرير.
آمريكانين غربينده موشخص اولان داييره كي 31 درجه شومالي و 141 درجه غربيده واقع
اولوب، (UARS) ماهواره‌سي‌نين
يئر جوّينه واريد اولان يئريني گؤرسه‌دير.
ماهواره‌نين مسيري آرام اوقيانوسو، كانادا، اطلس اوقيانوسو،
آفريقا قارّه‌سي و هيند اوقيانوسوندان كئچير و بالقوّه ماهواره‌نين قاليقلاري، بو
مسيرين 800 كيلومتر اوزونلوغوندا هر يئرينده اولا بيلر.
نيك جانسون، ناسانين «مداري زيبيل‌لر برنامه‌سي»نين ارشد
دانيشمندي دئدي: ناسا بو ماهواره‌نين يئنيش نوقطه‌سي و اونون قاليقلاريندان مؤعتبر
تصوير آلماييب. او تلويحاً كانادانين غربينده ايشيلدايان جيسملرين اوچماسينا(بو
ماهواره‌نين احتيمالي قاليقلاري) دايير شاييعه‌لري كي ايجتيماعي شبكه‌لرده
ياييليب، ردّ ائله‌دي.
او هابئله دئدي: نظره گلير بو ماهواره گرنويچ وقتي‌اينن
تقريباً ساعت 4:00 ده يئرين جوّينه واريد اولوب و شومالي آمريكانين ساحيل‌لرينه
چاتماميش آرام اوقيانوس سولارينا توشوب.