آمريكالي دانيشمندلر دونيادا بيرينجي دفعه اوچون آغري اؤلچن
دستگاه دوزلديبلر.
مهر خبرگوزاريسي‌نين گوزاريشينه گؤره، بو دستگاه كي
دوغرودان «آغري اؤلچن»دي «استنفورد» دانيشگاهي‌نين طيبّي مدرسه‌سي‌نين دانيشمندلري
طرفيندن دوزليب. بو تازا دستگاه ائليه بيلير بئينين فعاليتلري‌نين مودئل‌لريندن
ايستيفاده ائديب، اينسانين چكديغي آغريدان عئيني بير فيزيولوژي ارزيابليق ايرائه
وئرسين.
موحقيقلر بو نتيجه‌يه چاتماق و بئينين ايسكني اوچون
مغناطيسي رزونانس ايشله‌مه‌سيندن ايستيفاده ائله‌ييب سونرا ساليم آداملاردا دردين
اؤلچمه‌سي اوچون بو ايطيلاعاتي بير الگوريتمده پردازيش ائديبلر.
موحقيقلر بو باره‌ده دئييرلر: چوخداندير كي موحقيقلر آغريني
گؤرسه‌دن دستگاهين داليسيجانديلار. ايندي بيز سئوينيريك كي نهايتده بو تكنولوژيني
موزمين آغريلاري نيشان وئرمك اوچون ارزيابليق ائديريك.
آمار نيشان وئرير كي ايندي آمريكاليلارين 100 ميليون نفري
موزمين آغري چكيرلر و بو آغريدان قورتولماق اوچون اوست اوسته 600 ميليارد دولار
خرجله‌ييرلر كي بو خرجلرين چوخو آغري‌نين ميقداريني بيلمه‌مك اوچون فايداسيز
درمانلارا خرجله‌نير. بونا خاطير آغري ميقداري‌نين اؤلچمه‌سينه ايطمينانلي بير
مئتود ضروريدير. آغري اؤلچنين دوزلتمه ايده‌سي 2009-نجو ايلده بو دانيشگاهدا
وئريلدي. ايندي بو دستگاهين توسيعه‌سي‌اينن «استنفورد»-ون موحقيقلري 8 داوطلب
اوستونده آزماييش ائديرلر.
بو آزماييشده ايستيليق‌سوندو اينن بير مؤعتديل آغري بو
افرادا وئريلدي و آغريدان قاباق و سونرا بئينلري ايسكن اولدو، سونرا بو
ايطيلاعاتلار ايستاندارد مودئل‌لرين ياراتما هدفي‌اينن پردازيش اولدو.
بو ايش بير ده آيري 8 داوطلب اوستونده تيكرار اولدو و بو
دفعه كامپيوتر ايستاندارد مودئل‌لر اساسيندا چوخ يوخاري ديقّّت‌اينن تازا افرادين
آغريسين اؤلچدو. حقيقتده بو كامپيوتر ائليه بيلدي موريدلرين يوزده 81-نده آغريني
دوز تشخيص وئرسين.
بو دانيشمنلر تأييد ائله‌ديلر كي بو مئتودون موختليف
آغريلارين اؤلچمه‌سينده ايشه گلمه‌سي باره‌ده هله آرتيق موطاليعه‌يه احتياج وار و
گؤره‌سن ايستاندارد مودئل، ايضطيراب و افسورده‌ليك كيمي آيري ايستيليك احساسلاري
بير بيريندن آييرا بيلر؟