امام جواد (ع) امامته چاتاندا 8 یاشلاری واریدی. مأمون امام جوادی جماعتین
ایچینده اعتبارسیز ائله‌ماق اوچون او حضرت اینن گونون بؤیوک عالملرین آراسیندا مناظره‌لر تشکیل وئریردی.
بنی عباس امام جوادین (ع) علمی مقامینی سیناماق اوچون مأمونون اجازه‌سی اینن مجلس تشکیل وئرمیشدی و او گونون لاپ بؤیوک قاضیسی «یحیی
بن اکثم»، مجلسده مناظره اوچون حاضر ایدی. 9 یاشیندا اولان امام جواد (ع) مجلسه
داخل اولدو و اونا مخصوص اولان یئرده اَیلَشدی. جماعتدن نئچه دسته ده اوردا حاضر
ایدیلر.
یحیی بن اکثم دئدی: «مأمون! ابو جعفردن سؤال سوروشماغا اجازه وئریر؟»
مأمون دئدی: «ابو جعفرین اؤزوندن سوروشون».
یحیی امامدان سوروشدو: «منه سوروشماق اجازه‌سی وئریرسیز؟»
امام جواد (ع) بویوردو: «سوروش».
یحیی سوروشدو: «مُحرِم اولان انسان صید ائله‌ییب اؤلدورسه حُکمو نه اولار؟»
امام جواد (ع) بویوردو: «بو صیدی حرم منطقه‌سینده اؤلدوروب یوخسا حرمدن ائشیکده؟ صیدین اؤلدورمه‌سی‌نین حکمونو بیلیردی یا یوخ؟ عمداً اؤلدوروب یوخسا بیلمه‌دن اؤلدوروب؟ محرم انسان آزاد ایدی یوخسا برده؟ بؤیوک ایدی
یوخسا اوشاق؟ ایلک دفعه‌سی ایدی یوخسا سابقه‌سی واریدی؟ اؤلدورولن حیوان قوش ایدی یوخسا یوخ؟ کیچیک ایدی یوخسا بؤیوک؟ محرم
انسان بو ایشینه اصرار ائلیر یوخسا پئشماندیر؟ صیدی گوندوز اؤلدوروب یوخسا گئجه؟
اؤلدورن شخص عمره احرامیندا ایدی یوخسا حج احرامیندا؟
بو قدر بؤلمه‌دن
هویوخان یحیی بن اکثمین اوزوندن عاجزلیق آشکار اولدو و دیلی پلتک اولدو. هامی
اونون عاجزلیغینی گؤردولر و مجلس باشا چاتدی و مجلسده فقط آز تعداد قالدی. مأمون
محتلف قسمتلرین جوابینی امامدان سوروشدو و امام وسعتلی علمی اینن جوابینی وئردی و
کیچیک اولمالارینا رغماً علمی‌نین وسعتلیلیغینی حضارا آشکار ائله‌دی.