مجلس رئیسی و دولتین مخالفتینه رغماً، مجلس نماینده‌لری دولتی عالی شورا تشکیل وئریب ایکی ایله‌جن پایتختین انتقالینا مناسب شهرین تاپماسینا موظف ائله‌دیلر.

حتی مخالف نماینده‌لر طرفیندن مجلسده اوجالان «دوو دوو » سسلری‌ده بو طرحین تصویبینه مانع اولمادی. 200 ایلدن آرتیقدیر کی تهران پایتخت اولوب. ایندیه قدر نئچه دفعه اونون دَییشمه‌سی باره‌ده سؤزلر دانیشیلیب آما نهایت بوگون بو یولدا تأثیرلی آددیم آتیلیب.

اینترنده ساده آختاریشینان پایتختلیغا کاندیدا اولان شهرلرین لیستی گؤزوموزون اؤنونه گلیر: تبریز، اصفهان، مشهد، یزد و سمنان و . . .

آما گؤره‌سن پایتختی بو راحتلیقدا دَییشماق اولار؟

بو طرحین مجلسده‌کی موافق نماینده‌لری، وضعیّتین چوخ پیس اولدوغوندان خبر وئریردیلر، اؤلکه‌ جمعیّتی‌نین یوزده اون بیری و ثروت تولیدی‌نین یوزده ایرمی بئشی تهراندادیر. بو گئدیش اینن تهران داها ثروتلی و او بیری شهرلر داها کاسب اولورلار. تهراندا گونده‌لیق 14 میلیون لیتر بنزین مصرف اولور.

آما مقابلده مخالفلر هئچ شهرین تهران کیمی پایتختلیغا مناسب اولمادیغینی دئییرلر.

آما بو مصوّبه‌نین قاباغیندا بؤیوک مانعی وار؛ قانون اساسی‌نین 75-جی اصلینه گؤره نگهبان شوراسی ائلیه بیلر دولته مالی یوکو اولان مصوّبه‌لری ردّ ائله‌سین.