آیت الله جلالی خمینی دئدی: ایمام اون ایل دؤرد آی بو اؤلکه‌نین رهبری اولدو آما عؤمرونون آخیر آنینا قدر کیرایه اوتوروردو و ایختیاریندا اولان مولکلرین هامیسی ایجاره ایدیلر. او، آتاسیندان 4500 متر یئر ایرث آپارمیشدی کی او ایرثی کاسیبلار آراسیندا پایلاماقدا منی مأمور ائله‌میشدی. من‌ده یوز، یوز اللی متر قطعه‌لره بؤلوب جانبازلار و کاسیبلارا پایلادیم.
او آرتیردی: غیبت دؤرونده ویلایته بؤیوک خیدمت ائدنلرین ایکینجیسی ایمام خمینی (ره) ایدی. ویلایت فقیه باره‌سینده کیتاب یازان چوخلو عالیملریمیز وار آما حضرت ایمام، ویلایتی عملی صورتده جامیعه‌ده پیاده ائله‌دی. ایمام روحانیّتین عظمتینی قایتاردی. من پهلوی رژیمی‌نین حبسینده یئرده اوتورموشدوم کی مأمور دئدی نییه اوتوروبسان؟ من ایجازه وئرمه‌دن اوتورا بیلمزسن. آما ایندی رئیس جومهور، قضائیه قوّه رئیسی، مجلیس رئیسی و قوشون فرماندهلری بیر روحانی ایمضاسی ایله ایشه باشلیرلار. بیلمیرم ایمام و اینقیلاب اولماسایدی بو اؤلکه جماعتی‌نین دینی وضعیّتی نه جور اولاردی؟ هئچ کسین آمریکالی موستشارلارین قورخوسوندان نفس چکماق جورأتی یوخیدی. ایمام روحانیّته نه عیزّت وئردی.