میانمارداکی خشونتلرین تازا دؤرونده، ایفراطچی بوداییلار موسلمانلارین یوزلرجه ائو، مسجید و توکانینی غارت ائدیب اودا چکدیلر.
فارسین وئردیغی خبره گؤره ایفراطچی بوداییلار «راخین» منطقه‌سینده موسلمانلارین یوزلرجه ائو، مسجید، تیجارت مرکزی و توکانینا حمله ائله‌ماقلا اونلاری غارت ائدیب اودا چکدیلر.
رویترزین میانمار پولیسینه اساساً وئردیغی خبره گؤره، خشونتلر بیر موسلمان خانیمین خیاباندان کئچنده بودایی بیر راهیبه دَیمه‌سی‌اینن باشلاندی!
بو خبره اساساً بو حمله سه‌شنبه گونو اولدو و میانمارلی موسلمانلار خانیواده‌لر، آماندا قالماق اوچون جنگلده سیغینیب ائولری‌نین اودا چکیلمه‌سینه شاهید اولدولار. بو وحشی‌یانا حمله‌لرده ایکی مسجید ده اودا چکیلیب بوتونلوغونان داغیلدی.
بو حمله‌لر بیر شراییطده باش وئریر کی میانمار پولیسی حادیثه‌لرده اصلاً دخالت ائله‌میر. بعضاً ائله صحنه‌لر گؤروشور کی بوداییلار، پولیسین گؤزونون قاباغیندا وحشیلیغا ال وورورلار. دوشنبه گونو میانمار مجلیسی‌نین تحقیق کومسیونو فیکره سالان بیر ایقدامدا، دؤلتی وظیفه‌لندیردی کی خشونتلرین آزالماسی اوچون موسلمانلارین چوخالماسی‌نین قاباغینی آلسین.
«روهینگا» موسلمانلاری میانمارین 60 میلیون نفرلیق اهالی‌سی‌نین یوزده بئشینی تشکیل ائلیرلر. اونلار 1948دن یعنی میانمارین ایستیقلایندان بو طرفه دواملی حالدا شیکنجه، اذیت و دیقتسیزلیغینان اوزلشیبلر. پایتختین 130 کیلومترلیغیندا یئرللشن «میکتیلا» شهرینده کئچن آی باش وئرمیش خشونتلرده 200 نفردن آرتیق موسلمان اؤلدورورلوب و 12000 مین نفر آوارا اولوب. میانمارین بیر ایل قاباقکی خشونتلری‌ده یوزلرجه موسلمانین اؤلومو و آزیندان 150000 نفرین آوارا اولماسینا سب اولدو.