بو گئجه‌لرین لاپ یاخجی عمل‌لری محمد و آل محمده صلوات گؤندرماق، وارد اولان ذکرلری اوخوماق و باغیشلانماق اوچون دعا و دونیا و آخرت اوچون دعا ائله‌ماقدیر.

اوروچلوغون 19، 21 و 23-جو گئجه‌لری قدر گئجه‌لریدیر. قدر گئجه‌سینده قرآن نازل اولوب و اونون کیمی گؤزل گئجه یوخدور. بو گئجه ملائکه یئره نازل اولوبلار.

قدر گئجه‌سی‌نین عمللری

1. غسل ائتمک. غسل ائدرکن بئله نیت ائتمه‌لی‌دیر: "احیا گئجه‌سی‌نین غسلونو ائدیرم قربتاً الی الله". بو غسلون بؤیوک ثوابی واردیر.

 

2. سحره قدر اویاق قالیب عبادتله مشغول اولماق. سحره قدر اویاق قالیب عبادتله مشغول اولماغین معناسی بودور کی، انسان دئییر: "ایلاهی، سن بو گئجه منه قرآن نازل ائدیرسن و من ده بو گئجه سحره قدر اویاق قالیب اونو قارشیلاییرام."

 

3. مسجده گئتمک. مسجده گئتمگین معناسی بودور کی، انسان اؤز مقصدینی تعیین ائدیر. یعنی: "ائی الله‌یم، بو گئجه من فساد و پوزغونلوق اولان یئرلره گئده بیلردیم. لاکین من سنین راضی‌لیغینی قازانماق اوچون سنین ائوینه گلمیشم و گله‌جک خوشبختلیگیمی معیّن‌لشدیریرم."

 

4. قدر گئجه‌سی‌نین نامازی، قدر گئجه‌سینده قیلینان نامازین بؤیوک شرافتی واردیر. قدر گئجه‌سی‌نین نامازی شام و خفتن نامازلاری ایله صبح نامازی آراسین‌داکی واختدا قیلینیر. قدر گئجه‌سی‌نین نامازی‌نین قایداسی بئله‌دیر: 

 

نیت: "قدر گئجه‌سی‌نین نامازینی قیلیرام قربتاً الی الله". صبح نامازی کیمی ایکی رکعتلی‌دیر. لاکین هر حمد سوره‌سین‌دن سونرا 7 دفعه مبارک "اخلاص" سوره‌سی اوخونما‌لی‌دیر. نامازی قورتاردیقدان سونرا آلینی سجده‌یه قویا‌راق یئتمیش دفعه "استغفرالله و اتوب الیه" دئییلیر.

 

ایمام صادق (ع) بویورور: "هر کس بو نامازی قیلدیقدان سونرا سجده‌یه گئدیب یئتمیش دفعه " استغفرالله و اتوب الیه" دئیرسه، سجده‌دن قالخمامیش الله تعالا اونون اؤزونون و آتا-آناسی‌نین گوناهلارینی باغیشلایار."

 

5. قرآنی باشا قویوب الله تعالا ، پیغمبرین و اماملارین آدلارینا آند وئرمکله الله تعالا گوناه‌لاری‌نین باغیشلانماسینی، دونیا و آخرت ایستکلرینی بیلدیرمک. بو عملین معناسی الله تعالا انسان اوچون گؤندردیگی کتابی باشی اوسته قورویوب ساخلاماق دئمکدیر. یعنی: "ائی الله‌یم، سن منه حرمت ائدیب کتاب گؤندریرسن، من‌ده اونو اؤزوم اوچون رهبر و یول گؤرسه‌دن تعیین ائدیر و اونو همیشه باشیم اوستونده قورویوب ساخلایاجاغام". حضرت پیغمبر (ص) بویورور: "هر کس قرآنی اؤزونه رهبر ائتسه، قرآن اونو جنّته آپارار. هر کس قرآنی آرخادا قویسا و اونو اؤزونه رهبر ائتمه‌سه، قرآن اونو جهنّمه طرف یؤنلدر." (یعنی، هر کیم قرآنی اوخویوب اونا عمل ائدرسه و اونا تابع اولارسا، قرآن اونو جنّته آپاریب چیخارار. لاکین قرآنا تابع اولمایان شخص، قرآن اوخوماغینا باخمایا‌راق، جهنمه واصل اولار.)

قرآنی باشا قویوب الله تعالا و 14 معصوما آند وئرمگین معناسی بودور کی، "ائی الله‌یم، من سنه و سنین ان ایستکلی بنده‌لرینه آند وئریب توبه ائدیرم و سندن اؤز ایستک و احتیاجلاریمی دیله‌ییرم.