ترکی | فارسی | العربیة | English | اردو | Türkçe | Français | Deutsch
جمعه 10 فروردين 1403 - 18 رمضان 1445
 
 
 لینکهای بالای آگهی متحرک سمت راست
 
 لینکهای پایین آگهی متحرک سمت راست
 
 
امروز : 0
ديروز : 242
ماه : 3464
 
تاریخ : پنجشنبه 10 فروردين 1396     |     کد : 1364

لیلة‌الرغائب و رجب آیی‌نین فضیلتلری

قمری ایللرین یئددینجی آیی‌نین آدی رجبدیر.

قمری ایللرین یئددینجی آیی‌نین آدی رجبدیر. بو آیین فضیلتلری یاددان چیخمامالیدیر چونکی بو آی تکلیقدا چوخ یوخاری حرمت و ارزشه صاحبدیر. قرآن کریمده دؤرد آی «حرم» تعبیری ایله قید اولوب کی اونلاردا قتال و ساواش حرام ساییلیر و اونلارین بیری‌ده رجب آیی‌دیر.

الله‌ین رسولو (ص) بویوروب: «رجب الله‌ین بؤیوک آییدیر و حرمت و فضیلتده هئچ آی اونا چاتماز و بو آیدا کافرلره ساواش حرامدیر. بیلین کی رجب الله‌ین آیی و شعبان منیم آییم و رمضان امّتیمین آییدیر. هر کس رجبده حتی بیر گون اوروج توتسا الله‌ی اؤزوندن راضی ائدیب و الله‌ین غضبی اوندان اوزاقلاشار».

امام صادقدن (ع) نقل اولوب کی رسول الله (ص) بئله بویوروب: رجب منیم امّتیمین استغفار آییدیر. پس بو آیدا استغفار ائله‌یین کی الله‌ ارحم الراحمیندیر. رجبی «اصب» آدلاندیریرلار چونکی بو آیدا الله‌ین رحمتی منیم امتیمه چوخو نازل اولار. پس داها چوخ «استغفر الله و اسئله التوبة» دئیین.

امام صادقدن (ع) بیر روایتده بئله گلیب: «رجبین 27-جی گونونون اوروجونو الدن بوراخما کی او گون محمده (ص) نبوت مقامی وئریلیب. بو اوروجون ثوابی 60 آیینان برابردیر».

رجبین اهمیتینه گؤره اونا آیری آدلار دا وئریلیب: بو آیین باغیشلانماق آیی اولدوغونا گؤره «شهرالاستغفار». آیری حرام آیلاردان آیریلیب تک اولدوغونا گؤره «رَجَبُ الفَرد». الله‌ین رحمتی‌نین داها چوخ نازل اولماسینا گؤره «رَجَبُ الاَصَبّ». و «شهرُ امیرِالمؤمنین» آدی.

رجب آییندا اسلام گونشی‌ ظاهر اولدو و اسلام پیغمبری نبوته مبعوث اولدو. اوچ امامیمیز: امام علی (ع)، امام باقر (ع) و امام جواد (ع) ولادتی بو آیدا باش وئریب.

عین حالدا بو آیدا امام موسی کاظم (ع)، امام هادی (ع) و خانیم زینبین (س) وفاتی‌دا بو آیدا واقع اولوب.

لیلة الرغائب

رجب آیی‌نین لاپ گؤزل گونلریندن بیری بو آیین اول جمعه گئجه‌سیدیر. بو گئجه‌نین آدی لیلةالرغائبدیر.

رغائب رغیبه‌نین جمعیدیر. رغیبه «امرٌ مرغوب فیه عکاء کثیر» یعنی اوندان چوخلو موهبتلر و بخششلر اولان گئجه.

رسول الله‌دان نقل اولان بیر حدیثده بئله گلیب: «بو گئجه‌نین آدینی ملائکه قویوب و بو گئجه اوچون بیر نماز وار کی هر کس اونو قیلسا اونون ثوابی لاپ گؤزل شکلده و گولر اوزونن و فصیح دیل اینن قبرین اول گئجه‌سی نماز قیلانین گؤزونه ظاهر اولوب دئیر: ائی دوست من سنه هر چتینلیقدان نجات تاپدیغینی بشارت وئریرم». نماز قیلان اونا دئیر: «سن کیمسن؟ ایندی‌یه قدر بو جور گؤزل اوز و بوجور شیرین سؤز و بو جور گؤزل عطر بیلمه‌میشم». جواب گلر: «من سنین لیلةالرغائبده قیلدیغین نمازین ثوابی‌یام. گلمیشم کناریندا اولام و قورخونو سندن اوزاقلادام. صور چالینان زمان قیامت عرصه‌سینده سنین باشینا کؤلگه سالاجاغام. سئوین کی بو خیر سندن زایل اولمایاجاق».

لیلةالرغائب نمازی‌نین کیفیتی:

شام و خفتن نمازلاری آراسیندا هر ایکی رکعتی بیر سلاملا بیتن 12 رکعت نماز قیلاجاقسان. هر رکعتده بیر حمد 3 قدر و 12 توحید سوره‌سی اوخویاجاقسان. 12 رکعت بیتندن سونرا 70 دفعه « اللهم صل علی محمد النبی الاُمّی و علی آله» دئیه‌جاقسان سونرا سجده‌یه گئدیب 70 دفعه « سُبُّوحٌ قُدُّوسٌ رَبُّ الْمَلَائِکَةِ وَالرُّوحِ » دئییب الله‌دان ایسته‌دیقلارینی دیله گتیره‌جاقسان. انشاءالله مستجاب اولار.

رجبین 13-و اعتکاف عمل‌لری

ایام البیض آدلانان رجبین 13، 14 و 15-جی گونلری اعتکاف گونلردیر. بو اوچ گونده اعتکاف ائله‌ماغین چوخ ثوابی وار.

ام داوود عمل‌لری

رجب آیی‌نین مشهور عمل‌لریندن ام داوود اعمالیدیر.

عراقلی معرفت اهلی اولان بیر جوان منصور دوانیقی الیله اوزون مدتلی زندانا دوشور. آناسی تاب توانین الدن وئریب امام صادقین (ع) محضریته یئتیشیر و او حضرتدن چاره‌ایستیر. حضرت بویورور: بیلیرسن بو آی رجب آییدیر و اوندا دعالار مستجاب اولار؟ دئدیقلاریمی دقیقاً یئرینه گتیر کی اوغلون زنداندان قورتولسون».

«رجبین 13 ، 14 و 15-جی گونونو اوروج توت. 15-جی گونون گون‌اورتاسیندا غسل ائله و 8 رکعت نماز قیل. (نمازین نئجه‌لیغی مفاتیحده وار)». ام داوود نمازی قورتاران کیمی اوغلو آزاد اولدو. تئز حضرتین محضرینه چاتیب خبری اونا وئردی. امام بویوردو: «گئجه‌لرین بیرینده منصور دوانیقی جدّیم امیرالمؤمنین علی‌نی (ع) یوخودا گؤدو کی اونا بئله دئدی: «هر نه تئزراق اوغلوم داوودو آزاد ائله‌مه‌سن سنی اودا آتارام». منصور گؤزو قاباغیندا اودو گؤرنده داوودو آزاد ائله‌ماق مجبوریتینده قالدی.


نوشته شده در   پنجشنبه 10 فروردين 1396  توسط   کاربر 1    تعداد بازدید  106
PDF چاپ چاپ بازگشت
نظرات شما :
 
Refresh
SecurityCode