بهشت یول تاپا بیلنلرین بعضیسی‌نین مخصوص یئری وار.
بیر کیشی خانیمیسینا بئله تاپیشیریر: گئت خانیم فاطمه زهرانین (س) محضرینه سوروش کی من او حضرتین شیعه‌لریندنم یوخسا یوخ؟
او خانیم، خانیم فاطمه زهرانین (س) محضرینه چاتیب مطلبی سوروشور. خانیم زهرا (س) بویورور: امری ائله‌دیغیمزی یئرینه گتیرسن و نهی ائتدیگیمیزدن اوزاق گزسن، بیزیم شیعه‌میزسن یوخسا دئییلسن.
او خانیم ائوه قاییدیب خانم فاطمه زهرانین (س) بویوردوغونو ارینه دئییر. کیشی جوابی ائشیدندن سونرا ناراحت اولوب قیشقیردی: وای اولسون منه نئجه اولار انسان گناه و خطایا بولانماسین؟ بئله‌لیغینان من همیشه جهنّمده یاناجاغام. چونکی شیعه اولمایان جهنّمده یاناجاق.
او خانیم بیر داها خانیم فاطمه زهرانین (س) محضرینه چاتیب اری‌نین ناراحاتلیغین و سؤزلرینه او حضرتین محضرینه یئتیردی. حضرت بویوردو: حیات یولداشینا دئ کی؛ دوشوندوغون کیمی دئییل چونکی بیزیم شیعه‌لریمیز بهشت اهلی‌نین لاپ یاخجیلاریدیلار. آما بیزی و دوستلاریمیزی سئونلر و دوشمنلریمیزله دوشمن اولانلار، عملده گناهکار اولوب امر - نهی‌لریمیزله مخالفت ائدنلر آما دیلی و اورگی بیزیمله اولانلار دا بیزیم واقعی شیعه‌میز اولماسا بئله، بهشت اهلیدیر. منتهی گناهلاری‌نین پاکلاندیغیندان سونرا.
بلی، بئله‌لیغینان دونیا چتینلیقلاری و یا قیامت عذابلاری و یا جهنمین اوّل طبقه‌سینده‌کی کیفرلرینن گناهدان پاکلاناندان سونرا، بیزه خاطر جهنمدن قورتولوب بیزیم رحمت کناریمیزدا منزل تاپاجاقلار.
منبع:بحار الانوار، ج ۶۸، ص ۱۵۵