آيت الله سيد رضي شيرازيدان بير يادداشت
كيشيلرين بئيعتي نئجه ايدي؟
غدير خوطبه‌سي قورتولاندان سونرا جماعات حضرت پئيغمبر(ص) و علي (ع) طرف
هوجوم گتيريب بئيعت عونوانيندا اونلارينان اَل وئريرديلر و هم پئيغمبره و هم
اميرالمؤمنينه تبريك و تهنيت دئييرديلر، پئيغمبر ده بويوروردو: اَلْحَمْدُ لِلَّهِ
الَّذِی فَضَّلَنَا عَلَى جَمِیعِ الْعَالَمِین. تاريخ بئله يازير: خوطبه‌نين
قورتولوشوندان سونرا جماعاتين سسي اوجالدي كي: بلي ائشيتديك و آللاه و رسولونون
امري‌اينن اورك، ديل و اليميزينن ايطاعت ائديريك. سونرا حضرت پئيغمبر(ص) و علي
(ع)-ـه طرف هوجوم گتيريب بير – بيرلريني قاباقلاييب بئيعت عونوانيندا اونلارينان
اَل وئريرديلر.
مسأله‌نين رسميتي‌نين مؤحكملشمه‌سي اوچون و بونا خاطير كي جماعاتين هاميس
مونظم شيكلده بئيعت ائله‌سينلر، پئيغمبر (ص) امر ائله‌دي ايكي چادير قورولسون.
بيريني اؤزلرينه مخصوص ائديب امر بويوردولار كي جماعات ييغيشسين.
سونرا جماعات دسته دسته پئيغمبرين (ص) چاديريندا حاضير اولوب بئيعت ائله‌ييب
تبريك و تهنيت دئييرديلر. اوندان سونرا اميرالمؤمنين حضرت عليه (ع) مخصوص اولان
خئيمه‌يه گئديب پئيغمبردن سونرا ايمام و خليفه عونوانيندا اوننان بئيعت ائله‌ييرديلر.
و اميرالمؤمنين عونوانيندا اونا سلام وئريرديلر و بو والا مقامي او حضرته تبريك
دئييرديلر. جاليب نوكته بوردادير كي پيروزلوقلارين هئچ بيرنده _نه جنگلرده و نه
آيري موناسيبتلرده حتّا مكّه‌نين فتحينده _
گؤرمه‌ميشيك كي حضرت بويون كي كيمي بويورا :
منه تبريك و تهنيت دئيين، چون آللاه مني نبوّته و اهل بئيتيمي ايمامته
ايختيصاص وئريب. و بو بؤيوك فتح و كوفرينن نيفاقين كاميل سينماسي نيشانه‌سيدير.
بئيعت و تهنيت برنامه‌سي اوچ گونه‌جن ايدامه‌سي واريدي و بو مودّتده حضرت
غديرده ايديلر.
آروادلارين بئيعتي نئجه ايدي؟
پئيغمبر (ص) امر بويوردولار كي بير قاب سو گتيرسينلر و اونون آراسيندان بير
پرده چكسينلر ائله كي سويون ياريسي بير طرفده و ياريسي آيري طرفده قالسين تا
خانيملارين الي سويون بير طرفينده و حضرت علي(ع)نين الي سويون بير طرفينده قرار
تاپماغينان بئيعت انجام تاپسين.
هابئله امر بويوردولار آروادلار دا حضرته تبريك و تهنيت دئسينلر و بو امري
اؤز خانيملارينا تأكيد ائله‌ييرديلر.
دئمه‌ليدير كي ايسلامين بؤيوك بانوسي حضرت فاطمه (س) غديرده حاضير
اولانلاردان‌ايدي و هابئله پئيغبرين خانيملاري‌نين هاميسي او مراسيمده حاضير‌ايديلر.
ايمامت عمامه سي
بو مراسيمده پئيغمبر (ص) اؤز عمامه‌سين كي «سحاب» آدلانيردي، ايفتيخار تاجي
عونوانيندا اميرالمؤمنينين (ع) موبارك باشينا قويوب و عمامه‌نين آخيرني او حضرتين
چيگنينه سالديلار.
اميرالمؤمنين اؤزلري بو باره‌ده بويورورلار:
«غدير خم» گونو پئيغمبر باشيما بير عمامه باغلادي و بير طرفين چيگنيمه
سالدي و بويوردو: آللاه بدر و حنين گونلرينده مني، باشلاريندا بئله عمامه‌سي اولان
ملكلرينن كؤمك ائله‌دي.